Խորհրդարանն առաջին ընթերցմամբ ընդունեց «Լուսավոր Հայաստան» խմբակցության հեղինակած «Ազգային անվտանգության մարմիններում ծառայության մասին» օրենքում փոփոխություններ կատարելու նախագիծը: Նախագիծն ընդունվեց միաձայն՝ 112 կողմ ձայնով:

Մինչ քվեարկությունը, վարման կարգով խոսեց «Իմ քայլը» խմբակցության ղեկավար Լիլիթ Մակունցը՝ ասելով, որ մասնագիտական հանձնաժողովը նախագծին դրական եզրակացություն է տվել:

«Մենք կողմ ենք քվեարկելու՝ պայմանով, որ «Լուսավոր Հայաստան» խմբակցությունը նախագծի առաջինից երկրորդ ընթերցում քննարկմանը կաշխատի թե՛ «Իմ քայլը» խմբակցության, թե՛ Կառավարության հետ»,- ասաց նա:

Հիշեցնենք, որ այս փոփոխություներով առաջարկվում է ամրագրել, որ Ազգային անվտանգության ծառայության (ԱԱԾ) տնօրենի և ոստիկանության պետի պաշտոնները համարվելու են քաղաքական պաշտոն և այդ պաշտոններում նշանակվող անձանց համար ևս սահմանվելու են պատգամավորի թեկնածուին ներկայացվող պահանջները:

Նախագիծը դեռևս պետք է քննարկվի նաև երկրորդ ընթերցմամբ:

Լուսանկարում՝ նախագծի համահեղինակ, «Լուսավոր Հայաստան» խմբակցության պատգամավոր Տարոն Սիմոնյանը