Եթովպիայում կստեղծվի Հայաստանի դեսպանություն
Կառավարությունն այսօրվա նիստին որոշեց Եթովպիայի Դաշնային Ժողովրդավարական Հանրապետությունում ստեղծել Հայաստանի դեսպանություն։ Այն կլինի Եթովպիայի մայրաքաղաք Ադիս Աբեբայում։
Արտաքին գործերի նախարարության հաղորդմամբ՝ Հայաստանի և Եթովպիայի միջև դիվանագիտական հարաբերություններ հաստատվել են 1993թ. դեկտեմբերին: Նախարարությունը կարծում է, որ Եթովպիան ներկայում արագ տեմպերով աճող պետություն է, որը գրանցում է վարկանիշային աճ միջազգային հարաբերություններում։
Այնինչ Հայաստանը դիվանագիտական ներկայացվածություն չունի անդրսահարյան Աֆրիկայում։
«Ադիս Աբեբայում ՀՀ դիվանագիտական ներկայացուցչության ստեղծումը զգալիորեն կկարգավորի և կակտիվացնի ՀՀ շփումներն անդրսահարյան աֆրիկյան պետությունների հետ թե՛ հնարավոր տնտեսական հեռանկարների, թե՛ տարբեր միջազգային հարթակներում մայրցամաքի 50-ից ավելի պետությունների և դրանց աջակցությունը ստանալու տեսանկյունից»,- հայտնել է ԱԳՆ-ն։
Մեկնաբանել