Նախատեսվում է ասպիրանտուրայի հեռակա անվճար ուսուցմանը 228 տեղ հատկացնել
Կրթության, գիտության, մշակույթի և սպորտի նախարարությունը նախատեսում է 2019/2020 ուսումնական տարվա համար 228 տեղ հատկացնել ասպիրանտուրայի հեռակա անվճար ուսուցմանը։ Անվճար տեղերի առաջնահերթությունը տրվելու է բնագիտական, տեխնոլոգիական, ճարտարագիտական և մաթեմատիկական ոլորտներին (STEM)։
Նման առաջարկություն է նախարարությունը ներկայացրել իրավական ակտերի նախագծերի հրապարակման միասնական կայքում։
Կրթության, գիտության, մշակույթի և սպորտի նախարարությունն այս նախագծով նպատակ ունի բուհերի աշխատակիցների կազմը համալրել մասնագետներով, ովքեր ունեն նոր ուսումնասիրություններ համապատասխան ոլորտներում, տիրապետում են գիտատեխնիկական և տեղեկատվական տեխնոլոգիաների պահաջվող ռեսուրսներին, կարող են կազմակերպել ուսումնական գործընթացը նոր և արդյունավետ մեթոդներով:
«Նախագծի ընդունմամբ կապահովվի բարձր որակավորմամբ կադրերի պատրաստումը և կնպաստի պետության համար առաջնային ու կարևորություն ներկայացնող բնագավառներում մասնագետների երիտասարդացմանը»,- հայտնել է նախարարությունը։
Ասպիրանտական տեղերի հատկացման նախապայմաններ են լինելու պետական մարմինների ներկայացրած հետազոտությունների թեմաները, որոնց կիրառումը նպաստելու է ոլորտի զարգացմանը:
Մեկնաբանել