Երևանից «Զվարթնոց» օդանավակայան տանող ճանապարհին՝ խաչմերուկի հարևանությամբ, մոտ 100 մետր երկարությամբ գովազդային պաստառներ են փակցված՝ ճանապարհը բաժանող ցանկապատի երկայնքով: Փարաքարի համայնքապետի թեկնածուներից Դավիթ Մինասյանը որոշել է քարոզչական նյութերը փակցնել օրենքով չնախատեսված վայրերում: Օդանավակայան գնացող քաղաքացիների, օտարերկրյա հյուրերի աչքից պաստառներն աննկատ չեն մնում:

Սեպտեմբերի 29-ին Փարաքարում համայնքի ղեկավար են ընտրելու: Թեկնածուները չորսն են, որոնցից երկուսը Արմավիրի մարզի Փարաքար համայնքի ավագանու անդամներ են, մեկը՝ համայնքի ղեկավարի տեղակալն է, մյուսը՝ գործող համայնքապետը:

Դավիթ Մինասյանը ևս համայնքի ավագանու անդամ է: Առաջին անգամ չէ, որ վերջինս չնախատեսված վայրերում քարոզչական պաստառներ է փակցնում: Նա քարոզչական նյութեր էր փակցրել նաև մշակույթի տան տարածքում:

Թիվ 14 տարածքային ընտրական հանձնաժողովի նախագահ Գրիգոր Նազարյանը «Հետք»-ի հետ զրույցում ասաց, որ չնախատեսված վայրերում քարոզչական նյութեր փակցնելու համար բանավոր արդեն զգուշացրել են Դավիթ Մինասյանին: Նա գյուղի մշակույթի տան տարածքից պաստառներն արդեն հեռացրել է: Ինչ վերաբերում է օդանավակայան տանող պետական նշանակության ճանապարհի երկայնքով փակցված պաստառներին, ապա Գրիգոր Նազարյանի խոսքերով, այդ մասին թեկնածուն ևս զգուշացվել է բանավոր կարգով:

«Եթե պաստառները չհեռացվեն կհարուցվի վարչական վարույթ»,- ասաց թիվ 14 տարածքային ընտրական հանձնաժողովի նախագահը:

Պարզաբանում ստանալու նպատակով զանգահարեցինք նաև թեկնածուին, սակայն նա հեռախոսազանգերին չէր պատասխանում: