Կառավարությունը որպես նվիրատվություն ընդունեց Մաքսային պետական կոմիտեի (ներկայիս՝ Պետական եկամուտների կոմիտե) նախկին նախագահ Արմեն Ավետիսյանին պատկանող «Գոլդեն Փելիս» հյուրանոցը։ Նշենք, որ Արմեն Ավետիսյանը Մաքսային պետական կոմիտեի նախագահ է եղել 2001-2008 թվականներին։

Հուլիսի դրությամբ դրա շուկայական արեժեքը գնահատվել է 7 միլիարդ 535 միլիոն դրամ կամ 15․8 միլիոն դոլար։

Կառավարությունը նվիրատվության կարգով վերցրեց Ծաղկաձորում գտնվող 19 758 քառ. մետր մակերեսով շենք-շինությունները, դրանցում առկա գույքը, հյուրանոցի սպասարկման համար հատկացված 1.38 հեկտար մակերեսով հողամասը։

Ինչպես Կառավարությանը հայտնել է Պետական գույքի կառավարման կոմիտեն՝ իրենց  դիմել է «Գոլդեն Փելիս» հյուրանոց» ՍՊԸ-ի գլխավոր տնօրեն Ա. Ավետիսյանը, տեղեկացնելով, որ ընկերությունը ցանկանում է պետությանը նվիրել «Գոլդեն Փելիս» հյուրանոցային համալիրի շենք-շինությունները և հյուրանոցի ներսում առկա շարժական գույքը։

Հյուրանոցը ամրացվելու է Պետական գույքի կառավարման կոմիտեին՝ հետագայում պետության կարիքների համար շահագործելու նպատակով։

Հյուրանոցի պահպանության աշխատանքների կազմակերպումը վերապահվելու է ոստիկանությանը մինչև Կառավարությունը հյուրանոցի հետագա տնօրինման վերաբերյալ որոշման ընդունի։

Պետական գույքի կառավարման կոմիտեի նախագահ Նարեկ Բաբայանը Կառավարության անդամներին հայտնեց, որ հյուրանոցը գնելու համար կոմիտեն արդեն իսկ դիմումներ է ստացել։

Ըստ Բաբայանի՝ ամսական 6,5 միլիոն դրամ է հատկացվելու ոստիկանությանը հյուրանոցի պահպանման ծախսերը հոգալու համար։