Արմավիրի մարզի Փարաքար համայնքում շարունակվում են համայնքապետի արտահերթ ընտրությունները: 14/2 տեղամասում, ժամը 16։30-ի դրությամբ, գրանցված 1747 ընտրողներից քվեարկությանը մասնակցել են 643-ը:

Փարաքար համայնքում, ինչպես արդեն նշել էինք, առաջադրվել են գործող համայնքապետ, նախկին ՀՀԿ-ական Սամվել Վարդանյանը, որը արդեն 18 տարի պաշտոնավարում է, ավագանու անդամներ Սամվել Ավետիսյանն ու Դավիթ Մինասյանը, և համայնքապետի տեղակալ, նախկին ՀՀԿ-ական Սարդուր Թևոսյանը: Առաջադրված բոլոր 4 թեկնածուներ անկուսակցական են:

14/2-ում աշխատում է «Լեգալ պրոգրես իրավական ակումբի» դիտորդը, որը ողջ ընթացքում խախտում չի արձանագրել։ Այստեղ այլ անձի օգնությամբ քվեարկել է 12 հոգի:

Գրանցամատյանում խախտումներ չեն արձանագրվել։ Հանձնաժողովի նախագահի խոսքով` դժգոհությունները միայն բանավոր են։

Թեկնածու Դավիթ Մինասյանի վստահված անձը նշեց, որ ընտրատեղամաս ընտրողներ բերելու դեպքեր են գրանցվել։ 14/2 տեղամասը դպրոցում է տեղակայված, տեղամասի հարակից տարածքում երբեմն նկատվում են տղամարդկանց 4-5 հոգանոց խմբեր:

Վստահված անձի և հանձնաժողովի նախագահի միջև վիճաբանություն սկսվեց. վստահված անձը պնդում էր, թե տեղամաս նույն մարդը մի քանի անգամ է մտել, հանձնաժողովի նախագահն ասում էր՝ նման բան չի եղել, նկատելու դեպքում էլ անհրաժեշտ է այդ պահին իրեն զգուշացնել։

Քվեարկության եկած ընտրողները ընտրությունների ընթացքը նորմալ գնահատեցին, իսկ նախընտրական շրջանի մասին դժվարացան կարծիք հայտնել։