Սահմանադրական դատարանի նախագահ Հրայր Թովմասյանի լիազորությունները դադարեցնելու հարցով ՍԴ դիմելու ԱԺ որոշման նախագիծը քվեարկության կներկայացվի վաղը։

Այս մասին ԱԺ նիստում հայտարարեց Ժամանակավոր հաշվիչ հանձնաժողովի նախագահ Վահագն Հովակիմյանը։ Քվեարկությունը լինելու է վաղը՝ 11.00-ից 12.00-ն։ «ԱԺ կանոնակարգ» սահմանադրական օրենքի համաձայն՝ քվեարկությունը լինելու է փակ-գաղտնի ընթացակարգով։ Նախագիծը կընդունվի պատգամավորների ընդհանուր թվի առնվազն ⅗-ի դրական ձայների դեպքում։

Հիշեցնենք, որ նախաձեռնությունը հեղինակել է «Իմ քայլը» խմբակցությունը։ Քաղաքական մեծամասնության համոզմամբ՝ Հրայր Թովմասյանը երկրորդ նախագահ Ռոբերտ Քոչարյանի՝ ՍԴ-ում քննվող քրեական գործի շրջանակում էական կարգապահական խախտում է թույլ տվել, սրա գնահատականն էլ որոշման նախագիծն ընդունվելու դեպքում կտա բարձր դատարանը։ «Լուսավոր Հայաստանը» կողմ է քվեարկելու նախագծին, «Բարգավաճ Հայաստանը» չի մասնակցելու քվեարկությանը։