Պոչատարից արտահոսքի հետևանքով թափոնաջրերը լցվել են Շղարշիկ բանավան
Մայիսի 8-ին Սյունիքի մարզի Կապան քաղաքի վարչական տարածքի մեջ մտնող Շղարշիկ բանավանով անցնող «Զանգեզուրի պղնձամոլիբդենային կոմբինատ» ՓԲԸ-ի պոչատարից թափոնաջրերի արտահոսք է տեղի ունեցել, որի հետևանքով տրակտորով փորված փոսն ամբողջությամբ լցվել է թափոնաջրերով: Այս մասին նույն օրը' առավոտյան ժամը 09:00-ի սահմաններում, տեղեկացրել են Հայաստանի երիտասարդ իրավաբանների ասոցիացիայի Սյունիքի մարզային մասնաճյուղի, ՀԵԻԱ-ի կողմից գործարկվող Սյունիքի մարզի Շահերի պաշտպանության և աջակցության կենտրոնի ղեկավար, փաստաբան Արշավիր Խալափյանին:
Տեղեկանալուց անմիջապես հետո Ա. Խալափյանը մեկնել է դեպքի վայր, նաև հեռախոսազրույց ունեցել Կապանի Օրհուս կենտրոնի ղեկավարի, «Առավոտ» օրաթերթի թղթակցի, ինչպես նաև իրեն տեղեկացրած Վլադիմիր Մկրտչյանի հետ:
Ձևավորված խումբն անմիջապես կապ է հաստատել «Զանգեզուրի պղնձամոլիբդենային կոմբինատի» և Բնապահպանական պետական տեսչության Սյունիքի տարածքային բաժնի ներկայացուցիչների հետ:
Տեղի ունեցածի հետևանքով քաղաքացու տան դարպասի հարևանությամբ գոյացած թափոնաջրերի լիճը ճանապարհը դարձրել էր անանցանելի: Միայն դեպքի վայր հասած «Զանգեզուրի պղնձամոլիբդենային կոմբինատ» ՓԲԸ-ի աշխատակցի օգնությամբ է հնարավոր եղել գտնել պոչատարի այն հատվածը, որից թափոնաջրերի արտահոսք է տեղի ունենում:
Այնուհետև Շղարշիկ բանավանում տեղի է ունեցել «Զանգեզուրի պղնձամոլիբդենային կոմբինատ» ՓԲԸ-ի, Բնապահպանական պետական տեսչության Սյունիքի տարածքային բաժնի ներկայացուցիչների և ձևավորված խմբի հանդիպումը:
Ձեռնարկված միջոցառումների արդյունքում ժամը 13:00-ի սահմաններում նկատվել է, որ լիճ լցվող թափոնաջրի հոսքը նվազել է:
Փաստաբան Ա.Խալափյանը կատարվածի մասին պատրաստում է հաղորդում' Սյունիքի մարզի դատախազություն ներկայացնելու համար:
Մեկնաբանություններ (1)
Մեկնաբանել