Կառավարությունն ընդունեց «Գույքի նկատմամբ իրավունքների պետական գրանցման» օրենքում փոփոխություն կատարելու առաջարկը
Կառավարությունը հոկտեմբերի 10-ին ընդունեց Ազգային ժողովի «Լուսավոր Հայաստան» խմբակցության նախաձեռնած փոփոխությունը «Գույքի նկատմամբ իրավունքների պետական գրանցման մասին» ՀՀ օրենքում։ Առաջարկվում է նոր շինությունների նկատմամբ իրավունքների պետական գրանցման համար կառուցապատողից պահանջվող փաստաթղթերի ցանկից (հոդված 37, 1-ին մաս) հանել «սահմանված կարգով հաստատված շինության նախագիծը»։
Նիստում Կադաստրի կոմիտեն ներկայացնող ղեկավարի տեղակալ Արամ Կարախանյանը նախ ընդգծեց, որ նոր ստեղծված գույքի գրանցման փուլում սահմանված կարգով հաստատված շինության նախագիծն անհրաժեշտ փաստաթուղթ է, և հնարավոր է համարում այն հանել գրանցման համար ներկայացվող փաստաթղթերի ցանկից միայն այն դեպքում, եթե տեղադրված լինի համապատասխան հարթակում և հասանելի լինի Կադաստրի կոմիտեի համար։ Առաջարկեց խնդրին տալ ոչ թե կետային, այլ «փաթեթային» լուծում՝ Ինտեգրված կադաստրի ստեղծումով, որի վերաբերյալ որոշումը կառավարությունն ընդունել է 2019 թ. մայիսին։ Ըստ այդմ, նա փոխանցեց Կադաստրի կոմիտեի բացասական դիրքորոշումն օրինագծին։ Փոխվարչապետ Տիգրան Ավինյանն առաջարկեց, որպեսզի հեղինակն օրենքում փոփոխության ընդունման ժամկետ արձանագրի 2021 թվականի հունվարի 1-ը, երբ ամբողջովին թվայնացված կլինի Հայաստանում կադաստրին առնչվող տվյալների ամբողջ համակարգը։
Օրենքի ուժ ստանալու համար փոփոխությունը պետք է ներկայացվի Ազգային ժողով։
Լուսանկարում՝ Արամ Կարախանյանը կառավարության նիստում ներկայացնում է Կադաստրի կոմիտեի եզրակացությունը։
Մեկնաբանել