Երևան քաղաքի ընդհանուր իրավասության դատարանում՝ նախագահությամբ դատավոր Մեսրոպ Մակյանի, այսօր սկսվեց ՊՊԾ գնդի գրավման գործով ամբաստանյալների հարցաքննությունը:

Դատարանում առաջինը ցուցմունք տվեց ամբաստանյալ Պավել Մանուկյանը:

«Մեկ տարի, երկու ամիս առաջ ես հայտարարությամբ հանդես եմ եկել, որը դատարանն ընդունեց որպես ցուցմունք: Ես հիմա էլ  յուրաքանչյուր բառս պնդում եմ, դա բացարձակ ճշմարտությունն է»,- ասաց Պավել Մանուկյանը՝ նկատի ունենալով, որ ասել է, թե Արմեն Բիլյանը չի կրակել ՊՊԾ գնդում հրազենային վնասվածք ստացած, ապա հիվանդանոցում մահացած ոստիկան Գագիկ Մկրտչյանին:

Նշենք, որ Պավել Մանուկյանը նման հայտարարություն է արել այն ժամանակ, երբ դատարանը քննում էր Արմեն Բիլյանի խափանման միջոց կալանավորումն այլընտրանքային խափանման միջոցով փոխելու հարցը: Այդ ժամանակ գործով բոլոր ամբաստանյալները, բացառությամբ սպանության մեջ մեղադրվող Արմեն Բիլյանի և Սմբատ Բարսեղյանի, արդեն ազատության մեջ էին: Մանուկյանը  հայտարարել է նաև, որ ոստիկան Գագիկ Մկրտչյանը հրազենային վիրավորում է ստացել ՊՊԾ գնդի գրավման գործով անցնող մեկ այլ ամբաստանյալի՝ Էդվարդ Գրիգորյանի պատահական կրակոցից:

Մանուկյանը դատարանում հայտնեց, որ Էդվարդ Գրիգորյանն իրեն շատ վատ է զգացել պատահական կրակոցի պատճառով:

«Ինքն իրեն շատ վատ զգաց. մեռած էր, թաղած չէր»,- ասաց Մանուկյանը՝ նշելով, որ այս փուլի համար ինքն առայժմ ասելու ոչինչ չունի, և երբ խմբի մյուս անդամները խոսեն, այդ ժամանակ ինքն իր ասելիքը կշարունակի:

«Բայց կրկնում եմ՝ Բիլյան Արմենը չի: Բանկոմատը նույնպես Արմենը չի»,- հայտարարեց Պավել Մանուկյանը: Նշենք, որ վերջինս մեկ տարի առաջ տված ցուցմունքում հայտնել էր նաև, որ ՊՊԾ գնդի տարածքում եղած «բանկոմատի գրոհի հեղինակը եղել է ամբաստանյալ Մխիթար Ավետիսյանը»:

Նախագահող դատավոր Մեսրոպ Մակյանը Մանուկյանին հարց ուղղեց, թե ինչո՞ւ նախաքննության ընթացքում ցուցմունք չի տվել, և, ի պատասխան, Պավել Մանուկյանն ասաց, թե նախաքննությունից հետո իրավիճակ էր փոխվել, ուստի ինքը որոշել էր ցուցմունք տալ:

«Մինչ այս ո՞ր դատարանին ցուցմունք տայի: Երկրում իշխում էր Սերժի հանցավոր բանդան, ու՞մ ցուցմունք տայի»,- հայտարարեց Պավել Մանուկյանը: Վերջինս դատարանի հարցին ի պատասխան հայտնեց նաև, որ Արմեն Բիլյանին անձամբ չի տեսել ՊՊԾ-ի տարածքում գտնվող բանկոմատը կոտրելիս:

Պավել Մանուկյանը մեղադրող կողմի և դատարանի այլ հարցերին չպատասխանեց կամ չտվեց բովանդակային պատասխաններ: Նա պատասխաններ տվեց միայն սպանված ոստիկան Գագիկ Մկրտչյանի կնոջ հարցերին՝  հայտարարելով, թե դրանց պատասխանում է, որպեսզի ոստիկանի կինն իր մեջից հանի Արմեն Բիլյանի նկատմամբ ունեցած ոխը:

Մանուկյանը հայտնեց, որ պատահական հնչած կրակոցի ժամանակ Արմեն Բիլյանը եղել է ՊՊԾ գնդի զորամասի անցագրային կետի մուտքի մոտ, այսինքն՝ ոչ այն հատվածում, որտեղ հրազենային վնասվածք է ստացել Գագիկ Մկրտչյանը: Հայտնեց նաև, որ իրենք Գագիկ Մկրտչյանին օգնել են, ձեռքը փաթաթել, միասին զրուցել, նա շուրջ կես ժամ մնացել է զորանոցում, ապա նրան տեղափոխել են հիվանդանոց, իսկ թե ով կամ ինչ մեքենայով է տեղափոխել, Մանուկյանը չգիտի: Վերջինս հայտնեց, որ պատահական կրակոցից վիրավորում է ստացել նաև խմբի անդամներից Արմեն Լամբարյանը:

Սպանված ոստիկանի կինը՝ Հասմիկ Ոսկանյանը Մանուկյանին հարց ուղղեց, թե ինչո՞ւ էին անփորձ անձանց, որոնք պատահական կրակոց կարող են արձակել, իրենց հետ տարել հեղափոխություն անելու:

«Ես բան չունեմ ասելու, վերևն Աստված կա, ու ոնց տեսնում եմ՝ Աստված հերթով իր պատիժը տալիս է: Անկախ նրանից՝ ինչ է եղել, մարդու կյանք եք խլել, ու այսօր ձեր պատճառով իմ որդու վիզը ծուռ է: Հազա՛ր ամոթ: Պատահական կրակոց չի եղել. երկու քայլ հետ եք գնացել ու կրակել: Բանալի չտալու համար կրակո՞ց եք արձակում»,- ասաց Հասմիկ Ոսկանյանը:

«Այնտեղ ոչ մեկը ոչ մեկին չի ցանկացել սպանել»,- ի պատասխան ասաց Պավել Մանուկյանը՝ պնդելով, թե ինքը բացարձակ ճշմարտությունն է հայտնում:

«Ես եղել եմ արդարության մարտիկ: Շատ վատ է, որ ամբողջ հանրապետությունով մեկ տարածում են, թե Նիկոլ Փաշինյանը մեզ ազատեց: Ես չեմ հասկանում՝ մեզ Նիկոլ Փաշինյանը ազատե՞ց, թե՞ արդարադատությունը»,- դատարանում նաև նման հայտարարություն արեց Մանուկյանը: Վերջինիս հարցաքննությունն ավարտվեց:

Ըստ դատակոչի ցուցակի՝ հաջորդ մեղադրյալը, ով պետք է ցուցմունք տար, Արմեն Բիլյանն էր: Վերջինս հայտնեց, որ չի ցանկանում ցուցմունք տալ, հետագայում, կախված նրանից, թե դատական պրոցեսն ինչպես կընթանա, ինքը կասի իր ասելիքը:

Բիլյանն, այնուամենայնիվ, պատասխանեց դատավոր Մեսրոպ Մակյանի այն հարցին, թե ինչու նախկինում չի բարձրաձայնել ոստիկան Գագիկ Մկրտչյանի սպանության հանգամանքների մասին այն ամենն, ինչի մասին խոսում է Պավել Մանուկյանը:

«Էդ աճպարարական հնարքներով, որ մեղադրանքներն իմ վրա դրեցին, ես ընդհանրապես քննիչ կամ այլ անձ չտեսա: Ուղղակի թուղթը բերեցին, դրեցին, ասացին՝ պարո՛ն, խնդրեմ, գրել ենք քո փոխարեն ամեն ինչ: Ես առաջին օրվանից ասել եմ, որ մեղադրանքը չեմ ընդունում, որ այն շինծու է և շատ լկտի, սուտ մեղադրանք է: Այն ներկայացնող քննիչներին ասել եմ, որ դրա համար պատասխան են տալու: Դատարանում էլ բազմիցս կրկնել եմ, որ մեղադրանքը գրելու և ներկայացնելու համար անձինք պատասխան են տալու ՀՀ դատարաններում: Ես արդարության համար եմ պայքարել, և գնացել եմ ապստամբության իմ ժողովրդի համար, որի հետևանքով տեղի ունեցավ հեղափոխություն»,- հայտարարեց Արմեն Բիլյանը:

Վերջինս նշեց, թե իր դաստիարակությունն ու տղամարդկությունը թույլ չի տվել ավելին խոսել, սակայն նշեց, որ ամեն տղամարդ պետք է ունենա բարոյականություն և  համարձակություն, որպեսզի տեր կանգնի իր արածներին, իսկ ինքն իր արածներին միշտ տեր է կանգնել և կանգնելու է:

Մյուս ամբաստանյալների հարցաքննությունը կշարունակվի հաջորդ դատական նիստին:

Լուսանկարում՝ ձախից Պավել Մանուկյանը, Արմեն Բիլյանը