HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Պայքար «կարմիր գծերի» համար. վարորդներն ընդդեմ առևտրի շարժական տաղավարների

Երեւան քաղաքում ավտոմեքենաների կայանման կարմիր գծերում տեղերի սակավությունը լուրջ գլխացավանք է վարորդների համար: «Համապատասխան գումարը վճարում ես, բայց ժամերով տեղ ես փնտրում»,- ասում է վարորդ Միքայել Սարգսյանը:

Վերջին ամիսներին այդ խնդիրն է´լ ավելի է բարդացել կարմիր գծերի վրա տեղակայված առեւտրի շարժական ավտոբուս-սրճարանների կամ տաղավարների պատճառով, որոնց թիվը մեծ է հատկապես փոքր կենտրոնում: «Շաբաթներով կանգնում, առեւտուր են անում, իսկ մենք ամեն անգամ գործից ուշանում ենք տեղ չլինելու պատճառով»,- բողոքում է Արթուր Ավագյանը:

Վարորդները նշում են, որ նման ավտոբուսները, տաղավարները, որտեղ սուրճ եւ արագ սնունդ են վաճառում, գնալով շատանում են եւ խանգարում երթեւեկությանը: «Սկզբում նորմալ էր ամեն բան, մենք էլ ենք օգտվել էդ ավտոբուսներից։ Բայց դրանց պատճառով միշտ խցանման մեջ եմ ընկնում: Էս հարցով դիմել ենք «Վարորդի ընկեր» կազմակերպությանը»,- ասում է վարորդ Արսեն Մովսիսյանը:

Մեզ հետ զրույցում «Վարորդի ընկեր» հասարակական կազմակերպության նախագահ Տիգրան Քեյանը նշեց, որ հենց այս հարցով բազմաթիվ բողոքներ են ստանում: «Մենք փորձել ենք քայլեր ձեռնարկել՝ մի քանի անգամ դիմել ենք քաղաքապետարան: Քաղաքապետարանը փորձել է սահմանազատել, ազատել կարմիր գծերը, բայց օրենքով դեռեւս ոչ մի բան չեն կարողանում անել»,- ասում է Տ. Քեյանը:

Տաղավարներից մեկի պատասխանատուն, որը չցանկացավ ներկայանալ, նշեց, որ կայանման համապատասխան գումարը վճարել է ու խնդիր չի տեսնում. «Մենք օրենքին հակառակ որևէ բան չենք արել: Օրենքը չի արգելում նման տաղավարների գործունեությունը»։

Երեւանի քաղաքապետարանի տեղեկատվության եւ հասարակայնության հետ կապերի վարչության պետի տեղակալ Տարոն Գեւորգյանը նշեց, որ օրենքը չի արգելում նման ավտոբուս-տաղավարների կայանումը կամ գործունեությունը, որքան էլ, իր խոսքով, դա զարմանալի է: «Ներկա պահին մենք նախաձեռնել ենք օրենսդրական բարեփոխումների փաթեթ։ Առաջիկայում այն կներկայացվի Ազգային ժողով»,- ասաց քաղաքապետարանի ներկայացուցիչը:

Տարոն Գեւորգյանի խոսքով` կան կազմակերպություններ, որոնք վճարում են համապատասխան գումարն ու իրենց տեղերը հետո վաճառում են, օրենքով դա ևս չի արգելվում:

Տ. Գևորգյանը, սակայն, դժվարացավ կոնկրետ ժամկետ նշել, թե երբ օրենսդրական փոփոխությունը կներկայացվի ԱԺ-ի քննարկմանը:

Էլենիտա Սարգսյան

ԵՊՀ Ժուռնալիստիկայի ֆակուլտետ

3-րդ կուրս

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter