HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տիրայր Մուրադյան

Վարչապետի գաղտնի հանձնարարականով նախարարների աշխատավարձը կրկնապատկվել է

Կառավարման համակարգի արդյունավետությանը նպաստող գործոններից մեկը արժանապատիվ վարձատրությունն է։ Բազմիցս է խոսվել պետական պաշտոնատար անձանց ցածր աշխատավարձի մասին, և որ աշխատավարձերի բարձրացումը անհրաժեշտություն է։ Սակայն աշխատավարձերի բարձրացման գործընթացը պետք է լինի թափանցիկ և հրապարակային ընթացակարգերով։

Վարչապետ Նիկոլ Փաշինյանի գաղտնի հանձնարարականով էականորեն բարձրացել են նախարարների, փոխնախարարների և նախարարությունների գլխավոր քարտուղարների աշխատավարձերը։ Հանձնարարականը տրվել է հուլիս ամսին։

Գաղտնի հանձնարարականի վերաբերյալ «Հետք»-ի ստացած տեղեկությունը ստուգելու համար նախ գրավոր հարցմամբ դիմեցինք երեք նախարարությունների։ Ստացանք աշխատողների թվի և աշխատավարձային ֆոնդի վերաբերյալ մայիս-օգոստոս ամիսների տվյալները։ Մի նախարարության դեպքում նույն թվով աշխատակիցների պարագայում աշխատավարձային ֆոնդի էական տարբերություն կար։ Լրացուցիչ հարցում ուղարկեցինք երեք նախարարների՝ հարցնելով, թե նախարարը որքան աշխատավարձ, պարգևատրում և աշխատավարձին հավասարեցրած այլ վճարում է ստացել։ Օրինակ՝ ԱԻ նախարար Ֆելիքս Ցոլակյանը մայիս, հունիս, հուլիս և օգոստոս ամիսներին միասին ստացել է 6 միլիոն դրամ աշխատավարձ, նույնը Շրջակա միջավայրի նախարար Էրիկ Գրիգորյանի դեպքում էր։ Եթե աշխատավարձի թիվը բաժանում ենք 4 ամիսների, ստանում ենք ամիսը 1.5 միլիոն դրամ։ Ֆինանսների նախարար Ատոմ Ջանջուղազյանին էլ էինք նույնաբովանդակ հարցում ուղարկել։ Նախարարության գլխավոր քարտուղարը մեզ չտրամադրեց Ջանջուղազյանի աշխատավարձի մասին տեղեկություն։ Փոխարենն առաջարկեց սպասել տարեկան հայտարարագրին։

Պետական պաշտոն զբաղեցնող անձանց աշխատավարձի չափը սահմանված է օրենքով։ «Պետական պաշտոններ զբաղեցնող անձանց վարձատրության մասին» ՀՀ օրենքով նախարարի աշխատավարձի գործակիցը 12 է։ Նախարարի աշխատավարձը ստանալու համար այդ թիվը պետք է բազմապատկել բազային աշխատավարձով՝ 66 հազար 140 դրամով։ Հանրագումարը 793 հազար 680 դրամն է, որի մեջ ներառված են հարկերը։ Մինչդեռ առանց օրենքում փոփոխություն կատարելու, վարչապետի գաղտնի հանձնարարականով նախարարի աշխատավարձը կրկնապատկվել է և դարձել 1.5 միլիոն դրամ։

Նույն պատկերն է փոխնախարարների և գլխավոր քարտուղարների աշխատավարձերի դեպքում։ Օրենքով սահմանված գործակցով փոխնախարարի աշխատավարձը 562 հազար 160 դրամ է, որը դարձել է 1 միլիոն 60 հազար դրամ։ Գլխավոր քարտուղարի աշխատավարձը 595 հազար 260 հազար դրամից դարձել է 870 հազար դրամ։

Երբ արդեն ամեն բան պարզ էր, թե ինչ է կատարվել, գրավոր հարցմամբ դիմեցինք վարչապետ Նիկոլ Փաշինյանին՝ հարցնելով, թե ինչո՞ւ է գործընթացը գաղտնի ընթացակարգով իրականացվել։

Ներկայացնում ենք վարչապետի աշխատակազմի տեղեկատվության և հասարակայնության հետ կապերի վարչություն պետի պաշտոնակատար Արմեն Խաչատրյանի պատասխանը․

«Ձեր կողմից բարձրացված հարցը, ինչպես նշել եք, իրականացվել է գաղտնի ընթացակարգով, ուստի նման տեղեկատվությունը հրապարակման ենթակա չէ։ Անհրաժեշտ ենք համարում նշել, որ Ձեր կողմից նշված պաշտոնատար անձինք ներկայացնում են գույքի, եկամուտների և շահերի հայտարարագիր, ինչը ենթադրում է, որ վերը նշված գործընթացն ամբողջությամբ հրապարակային և թափանցիկ է»։

Լուսանկարը՝ gov.am-ի

Մեկնաբանություններ (7)

Գոռ
Լավ են անում ես Նիկոլ Փաշինյանի կողմից եմ. մարդիկ սովորել են դառել են նախարար կամ այլ մեծ պաշտոնյա ու ես կողմ եմ որ նախարարը ստանա 1.5միլիոն աշխատավարձ հալալա կարում էք դուքել 9 -10 տարի սովորեք դառեք նախարար կասեմ հալալա
Սամվել
10000 դրամ թոշակ ավելացրին, գլուխներս հարդուկին, սոցապ նախարարն էլ ասում է, որ 500000 դրամը իրենց համար քիչ է։ Ես համարում եմ, որ սրանք նույն թալանչիներն են, ինչպես նախորդները, դրա ապացույցներից մեկը իրենց աշխատավարձը «գաղտնի» բարձրացնելն է... Թալան, թալան մինչև վերջ, ճիվաղներ...
Կարո
Պարգևատրումներ տարին մի քանի անգամ, աշխատավարձի բարձրացում միանգամից 100 տոկոսով: Այս ամեն ինչը արդար կլիներ, եթե նույն ձևով պարգևատրումներ և աշխատավարձի 100 տոկոսով բարձրացումներ տեղի ունենային նաև համատարած բոլոր ոլորտներում, այդ թվում՝ պետականորեն երաշխավորված նվազագույն աշխատավարձի չափը սահմանելիս: Եթե մեկը ստանում է ամիսը 60.000 դրամ, իսկ մյուսը 20-ապատիկ կամ երեսունապատիկ ավել միայն նրա համար, որ պետական պաշտոնյա է, դա մեղմ ասած թալան է օրինական ձևով:
Yerevan2800
դե թող որոշները չհավատան բացահայտմանը ու ձեզ որպես ապացույց երեկվա ու բոլոր չհավատացողները մի հատ թող այս հղումը լավ կարդան https://hraparak.am/post/ada57acf4f0ec21a634a63a41f82042a, շատ լավ աշխատել է Հետքը, իսկ այդ գումարներից կանխիկով մասհանումներ չեն արվում հպարտ ֆոնդերին
Артур
Ամենսրժանին կոզբադին անանյանն է Նրա տված ուղղակի վնասը տասնյակ միլլիարդ է Թիվ կա աստղերին Թիվ չկա ՀՀ եւ եատմ բյուջեներին Հասցրած Անուղղակի վնասին ու ստացած պրեմիաներին ! Փաստեր ՞ ФЗ - ի դիպլոմով ցանկացած հաշվետար ջրի երես կհանի 2-3 ժամում
հայ
Հարգելի խմբագրություն, խնդրում եմ-ներկայացրեք,թե այդ հպարտ պաշտոնյաների մեկ ամսվա աշխատավարձը թոշակառուի քանի՛՛ տարվա թոշակն է կամ ուսուցչի քանի՛՛ ամսվա, գուցե և տարվա աշխատավարձը; Թեև կան հպարտ թոշակառուներ, որ ասում են․"Մենք քչով էլ յոլա կգնանք, մենակ թագավորը գլխներիս լինի՛՛; Ուսուցիչներ երևի չկան;
Էդիկ
Հարգելի Հետքի խմբագրություն հորդորում ենք հարցում կատարել նաև ՀՀ էկոնոմիկայի նախարարությանը մայիս - սեպտեմբեր ամիսների տրված պարգևատրումների վերաբերյալ: Այնտեղ կա արտոնյալների խումբ որոնք ամսեկան աշխատավարձից շատ պարգևատրումներ են ստանում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter