Գագիկ Ծառուկյանի համար վիրավորական է պաշտոնյաների աշխատավարձը բարձրացնելու վարչապետի գաղտնի որոշումը
Ընդդիմադիր «Բարգավաճ Հայաստան» խմբակցության ղեկավար Գագիկ Ծառուկյանը դատապարտում է վարչապետ Նիկոլ Փաշինյանին` նախարարների աշխատավարձը բարձրացնելու գաղտնի որոշման համար:
Հիշեցնենք՝ նախարարների, փոխնախարարների և նախարարությունների աշխատակազմերի գլխավոր քարտուղարների աշխատավարձը վարչապետի գաղտնի հանձնարարականով կրկնապատկվել է:
«Ժողովրդի սպասելիքն էր` հեղափոխություն կատարվեց, ժողովրդի թեկնածուն վարչապետ դառավ, կառավարությունը ժողովուրդն է, որոշողը ժողովուրդն է, բայց ժողովրդից թաքուն ոնց կարելի է անել: Կարելի է ներկայացնել, եթե ժողովուրդը դեմ չէ, որ նախարարն իր գործը կատարել է, խնդիր չկա, կարելի է տասնապատիկ ավելի տալ, եթե օգուտ է տվել պետությանը, խնդիր չկա, բայց թաքունը վիրավորական է և մեզ՝ պատգամավորներին, և ժողովրդին»,- խորհրդարանում լրագրողների հետ զրույցում ասաց Գագիկ Ծառուկյանը:
Գագիկ Ծառուկյանի համոզմամբ` հեղափոխությունից հետո բոլորի համար անընդունելի է ցանկացած որոշում, որը գաղտնի է արվում:
«Դատապարտում եմ, որ թաքուն է եղել»,- եզրափակեց նա:
Մեկնաբանել