Խորհրդարանը քննարկեց հանքերի իրական սեփականատերերին բացահայտելու նախագծերի փաթեթը
Ազգային ժողովն այսօր առաջին ընթերցմամբ քննարկեց Կառավարության ներկայացրած «Ընդերքի մասին օրենսգրքում փոփոխություններ և լրացումներ կատարելու մասին և կից ներկայացված օրենքների նախագծերի» փաթեթը: Փոփոխություններով առաջարկվում է ընդերքօգտագործման ոլորտում իրական սեփականատերերի հայտարարագիր լրացնելիս իրական սեփականատեր համարել նաև տվյալ ընկերության կառավարման միանձնյա և կոլեգիալ մարմինների անդամ ֆիզիկական անձանց: Նախագծերը ներկայացրեց տարածքային կառավարման և ենթակառուցվածքների փոխնախարար Լիլիա Շուշանյանը:
Փոխնախարարի խոսքով` բոլոր խմբակցությունների հետ քննարկման արդյունքում իրական սեփականատերերի հետ կապված լրացումներ են կատարվել նախագծում:
«Մենք պայմանավորվեցինք, որ փաթեթով պետք է ընդլայնենք ընդերքի ոլորտում իրական սեփականատերերի հասկացությունը և առաջարկեցինք, որ ընկերության կառավարման միանձնյա և կոլեգիալ մարմիններում ընդգրկված ֆիզիկական անձինք նույնպես համարվեն իրական սեփականատեր՝ ի լրումն այն առաջարկի, որ հայտարարագրերի ներկայացման նոյեմբերի 30-ը վերջնաժամկետը երկարաձգվում է մինչև հունվարի 30-ը՝ նպատակ ունենալով ապահովել համապատասխան ծրագրային ապահովում»,- ասաց Շուշանյանը:
Փոխնախարարի խոսքով` նախագծով առաջարկվող փոփոխությունները տարաբնույթ են:
Փոփոխությունների մի մասը հիմնականում ընթացակարգային են և որոշակի վարչարարության հստակեցումներ են ենթադրում, սակայն դրանք բարելավում են նաև թույտվությունների տրամադրման գործընթացը:
Առաջարկվում է նաև փոփոխություն կատարել վիճակագրական հաշվետվությունները հստակ պարտավորություն սահմանելու հարցում, որպեսզի հնարավորինս բացառվեն կամայական մոտեցումները: Ըստ փոխնախարարի` առավել հիմնարար փոփոխությունները կապված են այլ մեխանիզմի հետ:
«Խոսքը գնում է մեկանգամյա թույլտվության մեխանիզմի ներդրման մասին՝ բոլոր այն դեպքերում, երբ իրականացվում է ճանապարհների, ջրամբարների, հաղորդակցության ուղիների, ինչպես նաև թունելների շինարարություն և կարևորագույն նշանակության ստորգետնյա պահեստարանների շինարարություն: Այս դեպքում համապատասխան փորձաքննություն անցած նախագծերի դեպքում առաջարկվում է տվյալ տարածքից արդյունահանված օգտակար հանածոները թույլատրել օգտագործել բացառապես տվյալ նախագծերի համար»,- ասաց նա:
Շուշանյանի խոսքով` հստակ պայմաններ են սահմանված, որ տվյալ օգտակար հանածոն պետք է հաշվառված չլինի օգտակար հանածոների պետական հաշվեկշռում, այսինքն հանքավայր չլինի և լինի ոչ մետաղական:
Մեկնաբանել