Խաչենի ջրամբարի ափերին սատկած ձկների ​​​​​​​​​​լաբորատոր փորձաքննության արդյունքներն Արցախի գյուղատնտեսության նախարարությունն ուղարկել է Բնապահպանության նախարարությանը, որպեսզի գերատեսչությունն ընդհանրացնի դրանք: Այս մասին «Հետքին» հայտնեց Գյուղատնտեսության նախարարության Սննդամթերքի անվտանգության պետական ծառայության պետ Արթուր Ներսիսյանը։

«Նաև ԱՀ առողջապահության նախարարության Պետական հիգիենիկ և հակահամաճարակային տեսչությունն էլ է փորձաքննություն իրականացրել, նա էլ պիտի ընդհանրացնի: Այս երեք կառույցի փորձաքննության հիման վրա պիտի եզրակացության գանք», - ավելացրեց նա: 

ԱՀ բնապահպանության և բնական ռեսուրսների նախարարի խորհրդական Հարութ Մնացականյանն էլ ասաց, որ վերջնական եզրակացությունը պատրաստ լինելու դեպքում հայտարարություն կարվի։

Հիշեցնենք, որ հոկտեմբերի 19-ին, հղում անելով ֆեյսբուքյան օգտատեր Վլադիմիր Դոլուխանյանի տարածած տեսանյութին, գրել էինք, որ Ասկերանի և Մարտակերտի շրջանների սահմանագլխին գտնվող Խաչեն ջրամբարի ափերին հազարավոր սատկած ձկներ են հայտնվել:

Հաջորդ օրը Արցախի գյուղատնտեսության նախարարության Սննդամթերքի անվտանգության պետական ծառայությունը հաղորդագրություն է տարածել, որ ափամերձ գոտում ձկների անկման պատճառները պարզելու նպատակով լաբորատոր փորձաքննության իրականացման համար նմուշներ են վերցրել և՛ ջրից, և՛ ձկներից:

Հոկտեմբերի 20-ին, երբ «Հետքն» այցելել էր Խաչենի ջրամբար, ափերին հատուկենտ սատկած ձկներ էին մնացել. Սննդամթերքի անվտանգության պետական ծառայությունը տարածքի մաքրման ու ախտահանման կանխարգելիչ միջոցառումներ էր իրականացրել։