HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Շրջակա միջավայրի նախարարության գործողումների ծախսերը նվազել են

Շրջակա միջավայրի նախարարության ծախսերի համար 2020 թվականի պետական բյուջեից հատկացվել է 6,9 միլիարդ դրամ, որից 1,6 միլիարդ դրամ Գերմանական զարգացման բանկի կողմից դրամաշնորհի տեսքով տրվող գումարներն են:

Այս մասին Ազգային ժողովի տարածքային կառավարման, տեղական ինքնակառավարման, գյուղատնտեսության և բնապահպանության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում ասաց շրջակա միջավայրի նախարար Էրիկ Գրիգորյանը:

«Անտառապահների աշխատավարձի բարձրացման հետ կապված որոշակի գումարներ ավելացել են, ինչպես նաև Սևանի ջրածածկ տարածքների մաքրման հետ կապված ավելացումներ կլինեն: Պետական պահպանության ծախսերը նվազել են` հիմնականում գործուղումների և վառելիքի համար հատկացվող գումարների հաշվին»,- ասաց նախարարը:

Ֆինանսավարկային և բյուջետային հարցերի հանձնաժողովի նախագահ Մանե Թանդիլյանը հետաքրքրվեց վարչապետ Նիկոլ Փաշինյանի հայտարարած տաս միլիոն ծառատունկի մասին` ասելով, որ բյուջեի նախագծում դրա արտացոլումը չկա՝ ինչ միջոցներով է իրականացվելու այն:

Էրիկ Գրիգորյանն արձագանքեց, որ արդեն կապ են հաստատել Բելառուսի, Վրաստանի, Ռուսաստանի գործընկերների հետ և նախնական պայմանավորվածություն ունեն տնկիների վերաբերյալ համատեղ ծրագիր ներկայացնելու: Նախարարի խոսքով, սակայն, այդ ծրագիրն ինչպես վարչապետն է նշել, համահայկական նշանակություն ունի, որի նպատակն այն է, որ մասնակցեն Հայաստանի ու սփյուռքի տարբեր շահառուներ:

Մանե Թանդիլյանը նաև անդրադարձավ այն հարցին, որ բյուջետային համակարգի մասին օրենքի անհամապատասխանություն կա շրջակա միջավայրի նախարարության` 2020 թվականի պետական բյուջեի ծրագրում:

Բնապահպանական ծրագրերի գծով ծախսերի համար, ըստ Բյուջետային համակարգի մասին օրենքի, պետք է հատկացվեր 54 միլիարդ դրամ, սակայն հատկացվել է 16 միլիարդ` 40 միլիարդով պակաս:

Էրիկ Գրիգորյանն արձագանքեց, որ այսպես թե այնպես, ոլորտի հատկացումները պետք է ավելանան տարիների ընթացքում, սակայն բյուջետային համակարգի մասին այդ դրույթի մեկնաբանման հստակեցման կարիք կա:

Այս պատասխանը չբավարարեց Մանե Թանդիլյանին. «Եթե դուք պատրաստ չեք այդ ծրագրերն իրականացնել, կներեք՝ ինձ մոտ ձեր պաշտոնավարման նպատակահարմարությունը հարցականներ է առաջացնում»,- ասաց Թանդիլյանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։