Իրավապահ մարմիններն անհանգստացած են, որ համայնքներում գրանցվում են անչափահաս աղջիկների ամուսնության դեպքեր: Ոստիկանության Արմավիրի մարզային վարչության Արմավիրի բաժնից միջնորդագրեր է ուղարկվել համայնքների ղեկավարներին, որպեսզի վերջիններս բացատրական աշխատանքներ տանեն համայնքներում:

Քրեական օրենսգրքի 141-րդ հոդվածը, որը վերաբերում է 18 տարին լրացած անձի կողմից ակնհայտ 16 տարին չլրացած անձի հետ պարբերաբար սեռական հարաբերություն ունենալուն, «գլխացավանք» է դարձել մարզերում: Այդ հոդվածով մեղադրանք է առաջադրվում հատկապես ազգությամբ եզդի տղաներին, ովքեր ամուսնանում են անչափահաս աղջիկների հետ:

Այդ մեղադրանքը նախատեսում է ազատազրկում՝ 4-10 տարի ժամկետով: Քանի որ եզդի տղաները փաստացի գտնվում են ամուսնական հարաբերությունների մեջ, դատարանները նրանց նկատմամբ մեղմ պատիժ են նշանակում՝ 4 տարի: Սակայն, նրանց պատիժը պայմանականորեն չի կիրառվում` սահմանելով փորձաշրջան վարքի նկատմամբ հետագա վերահսկողությունը հանձնում են քրեակատարողական վարչության ազատությունից զրկելու հետ չկապված պատիժների կատարման ստորաբաժանմանը։

Արմավիրի մարզի Արազափ համայնքի ավագանին նույնիսկ որոշում է կայացրել և ի գիտություն համայնքի ղեկավարի՝ հանձնարարել համայնքում գործող խնամակալության և հոգաբարձության հանձնաժողովին բնակչության շրջանում բացատրական աշխատանքներ տանել, որ անչափահասների հետ ամուսնությունների համար նախատեսվում է քրեական պատասխանատվություն:

Արազափի ավագանու 7 անդամներից 2-ը ազգությամբ եզդի են, նրանք ևս կողմ են քվարկել:

Նշենք, որ Ընտանեկան օրենսգրքի համաձայն՝ ամուսնության կնքման համար անհրաժեշտ են ամուսնացող տղամարդու և կնոջ փոխադարձ կամավոր համաձայնությունը և նրանց ամուսնական` 18 տարեկանի հասնելը: Անձը կարող է ամուսնանալ նաև 17 տարեկանում, եթե առկա է նրա ծնողների, որդեգրողների կամ հոգաբարձուի համաձայնությունը: Անձը կարող է ամուսնանալ նաև 16 տարեկանում, եթե առկա է նրա ծնողների, որդեգրողների կամ հոգաբարձուի համաձայնությունը, և ամուսնացող մյուս անձն առնվազն 18 տարեկան է:

Արազափի համայնքապետ Մանվել Հարությունյանը «Հետք»-ի հետ զրույցում ասաց, որ իրենց գյուղի բնակչության 30%-ը ազգությամբ եզդիներ է, և հենց նրանք են վաղ տարիքում ամուսնանում:

Նշեց, որ համայնքում 99% դեպքերում եզդի աղջիկներն ամուսնանում են մինչև 18 տարեկան դառնալը՝ 15-17 տարեկանում:

«Տարբեր ձևերով բացատրական աշխատանքներ ենք տանում, որ չի կարելի: Կոպիտ ասում ենք, խաթրով ասում ենք, չի լինում: Ծնողներին եմ կանչում իմ մոտ, բացատրում եմ, որ չի կարելի աղջիկներին շուտ ամուսնացնել, ինչ ասես՝ անում ենք, որ օգուտ տա»,- ասում է Մանվել Հարությունյանը: