HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

«Պատգամավոր ունենք՝ ավելի շատ թռնում է, քան քայլում». օրենսդիրները քննարկեցին գործուղումների հարցը

2020 թ. պետական բյուջեի նախագծի քննարկման ժամանակ օրենսդիրներն անդրադարձան իրենց գործուղումների վերաբերյալ մամուլի հրապարակումներին:

«Իմ քայլը» խմբակցության պատգամավոր Արտակ Մանուկյանը, դիմելով ԱԺ աշխատակազմի ղեկավար, գլխավոր քարտուղար Տիգրան Գալստյանին, հետաքրքրվեց, թե կա՞ արդյոք համեմատական՝ մեկ պատգամավորի հաշվով միջին գործուղման ծախսը այս և նախորդ գումարման խորհրդարաններում վեց ամսվա տվյալներով որքան է:

Տիգրան Գալստյանն ասաց՝ թիվը չի կարող նշել, սակայն այն նվազելու միտում ունի: Նույն համեմատությամբ նվազել են նաև ներկայացուցչական ծախսերը: Պատվիրակությունների ընդունման համար 40 միլիոն դրամով քիչ է եղել ծախսը` 2018-ի նույն ժամանակահատվածի համեմատությամբ:

Տիգրան Գալստյանը, սակայն, հավելեց, որ գործուղումներին հատկացվող գումարները բացարձակ արժեքով ավելի են եղել այս տարի, քան նախորդ տարի էր:

Վերջինս սակայն վստահեցրեց, որ գործուղումների հետ կապված խիստ վերահսկողություն են սահմանում սկսած տոմսերի գներից մինչ պատվիրակությունների ծրագրով պայմանավորված արտերկրում լինելու ժամանակահատվածը:

«Նաև նոր կարգավորում ենք ուենալու, որով հստակ երևում է, թե պատվիրակը երբ է մեկնում, երբ վերադառնում։ Այս պահի դրությամբ ունենք որոշակի բանավոր կարգավորումներ, իսկ փոփոխությունները հնարավորություն կտան հստակեցնել մեկնման և վերադարձի հետ կապված հարցերը»,- ասաց Գալստյանը:

«Բարգավաճ Հայաստան» խմբակցության պատգամավոր Գևորգ Պետրոսյանն էլ ասաց, որ պետք է մեխանիզմ մշակել, որ պատգամավորը հաշվետվություն ներկայացնի իր գործուղման արդյունքների վերաբերյալ:

«Պատգամավոր ունենք՝ ավելի շատ թռնում է, քան քայլում, հանրությունը հարցնում է, թե էդ մարդու երկրին տված օգուտը որն է»,- ասաց Պետրոսյանը` հավելելով, որ պատգամավորների գործուղումների արդյունքը պետք է տեսանելի լինի:

Պետական-իրավական հարցերի հանձնաժողովի նախագահ Վլադիմիր Վարդանյանը ավելացրեց՝ ընդհանրապես պատգամավորի աշխատանքի արդյունքը պետք է տեսանելի լինի:

«Կան պատգամավորներ, որոնք գործուղման չեն մեկնում, բայց աշխատանքի օգտակար գործողության գործակիցը շատ ցածր է»,- ասաց Վլադիմիր Վարդանյանը` հավելելով, որ կա նման կարգավորում, և գործուղումից վերադարձած պատգամավորները մամուլի ասուլիսի միջոցով հաշվետվություն են ներկայացնում գործուղման ժամանակ կատարած աշխատանքի վերաբերյալ:

Խորհրդարանի աշխատակազմի ղեկավար Տիգրան Գալստյանն էլ արձագանքեց, որ իր լիազորությունների շրջանակում չէ գործուղման վերաբերյալ պատգամավորի աշխատանքի գնահատում իրականացնելը: Աշխատակազմի խնդիրը գործուղումն ապահովելն է, և ճիշտ կլինի, որ պատգամավորները՝ որպես օրենսդիրներ, սահմանեն նմանատիպ կարգավորումներ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։