![](/static/articles/01/09/27/l-jvLmGWSxJa.jpg)
«Անկարգ» պատգամավորները մնացին անպատիժ
Այսօր Ազգային ժողովի նախագահ Սամվել Նիկոյանի հրավիրած խորհրդակցության ժամանակ մի շարք հարցերի թվում քննարկվել է նաև ԱԺ նախագահին ՀՔԾ-ի ուղարկած գրությունը: Քննարկման արդյունքում Սամվել Նիկոյանը որոշել է դիմել Ազգային ժողովի խմբակցություններին՝ կոչ անելով աշխատանք կատարել հետայսու պատգամավորների կողմից ուրիշի փոխարեն քվեարկելու երևույթները բացառելու համար:
Հիշեցնենք, որ փետրվարի 9-ի նիստում՝ մի շարք օրենքների ընդունման ժամանակ, պատգամավորներ Արա Բաբլոյանը, Ռաֆիկ Գրիգորյանը, Հերմինե Նաղդալյանը, Արեգ Ղուկասյանը և ՀՀԿ խմբակցության քարտուղար Գագիկ Մելիքյանը քվեարկել էին այլ պատգամավորների փոխարեն՝ ապահովելով քվորումը:
«Հայաստանի պառլամենտարիզմի կենտրոն» կազմակերպությունը դիմել էր Հատուկ քննչական ծառայությանը՝ ուրիշի փոխարեն քվեարկած պատգամավորներին պատասխանատվության ենթարկելու համար: ՀՔԾ-ից դիմումը վերահասցեագրվել էր ԱԺ նախագահ Սամվել Նիկոյանին:
Սամվել Նիկոյանն էլ այսօր՝ քննարկման ժամանակ, արձանագրել է, որ հիշատակված նիստում՝ քվեարկության ժամանակ, «Ժառանգություն» խմբակցության պատգամավոր Լարիսա Ալավերդյանը վարման կարգով ելույթ է ունեցել և նշել է մեկ պատգամավորի անուն՝ ասելով, որ նա քվեարկել է ուրիշի փոխարեն, սակայն չի առաջարկել վերականգնել քվեարկության արդյունքները լուսատախտակի վրա: Նիստը վարողը, հաշվի առնելով քվեարկության արդյունքները և այն, որ հիշատակված դեպքը էականորեն չի ազդում քվեարկության արդյունքների վրա, վերաքվեարկություն չի հայտարարել:
«Ինչ վերաբերում է նիստի ընթացքում պատգամավորների կողմից թույլ տրված կանոնակարգային խախտումների մասին հիշատակումներին, փաստ է, որ բացի վերոհիշյալ դեպքից՝ կոնկրետ այլ պատգամավորների անուններ որևէ պատգամավորի կողմից չեն հնչեցվել: Ուստի, նիստը վարողը «Ազգային ժողովի կանոնակարգ» ՀՀ օրենքի 45-րդ հոդվածի 3-րդ կետի հիմքով պատգամավորների նկատմամբ կարգապահական միջոցներ չի կիրառել՝ հորդորելով պատգամավորներին ուրիշի փոխարեն չքվեարկել»,- եզրահանգել են խորդակցության մասնակիցները:
Միամիտ է հավատալ, թե Սամվել Նիկոյանն իր «բարձր» դիրքից չի տեսնում, թե ինչպես են իր խմբակցության պատգամավորները, իրար հերթ չտալով, քվեարկում բացակա պատգամավորների փոխարեն: Ավելին, այս արատավոր երևույթը եթե չասենք խթանում, ապա աջակցում է հենց ՀՀԿ խմբակցությունը, քանի որ խմբակցության քարտուղար Գագիկ Մելիքյանը նույնպես առիթը բաց չի թողնում այլ պատգամավորի փոխարեն քվեարկելու համար:
Թեև Սամվել Նիկոյանն այսօր դիմել է խմբակցություններին, այլ կերպ ասած՝ «անկարգ» պատգամավորներին կարգի բերելու համար, սակայն դժվար է հավատալ, որ պատգամավորներն այսուհետև զերծ կմնան ուրիշի փոխարեն «կոճակ սեղմելու» արմատացած սովորությունից:
Ավելին, շատերը նույնիսկ չեն էլ զղջում իրենց արարքի համար և բացահայտ ասում են, թե նման բան չի եղել: Օրինակ՝ տեսախցիկները հստակ արձանագրել են, թե ինչպես է Գագիկ Մելիքյանը մի քանի անգամ քվեարկում իր կողքին նստող Մկրտիչ Մինասյանի փոխարեն, սակայն ՀՀԿ խմբակցության քարտուղարը շարունակում է պնդել, թե նման բան չի եղել:
Այսքանից հետո արժե՞ հավատալ Սամվել Նիկոյանի քննարկմանն ու խմբակցություններին ուղղված հորդորներին:
Մեկնաբանել