HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Կ. Փոլադյան․ «Սյունիքի մարզի ընդհանուր իրավասության դատարանում ունենք դատավոր, որի վարույթում կա 134 քրեական գործ»

2020 թվականի պետական բյուջեի նախագծի քննարկմանն անդրադարձ եղավ նաև դատավորների թվի ոչ բավարար լինելուն և դատարանների ծանրաբեռնվածությանը: Դատական դեպարտամենտի ղեկավար Կարեն Փոլադյանն ասաց, որ տասը դատավոր ավելացնելու բյուջետային հայտը մերժել է Ֆինանսների նախարարությունը:

«Սյունիքի մարզի ընդհանուր իրավասության դատարանում ունենք դատավոր, որի վարույթում կա 134 քրեական գործ, այն դեպքում, երբ մի դատարան ամբողջ տարվա ընթացքում այդքան գործ չի ստանում. սա խայտառակ իրավիճակ է»,- ասաց Փոլադյանը:

Պետական-իրավական հարցերի հանձնաժողովի նախագահ Վլադիմիր Վարդանյանը հետաքրքրվեց, թե որն է մերժման պատճառը: Պատգամավորը հիշեցրեց, որ Հայաստանը Արևելյան Եվրոպայի երկրների շարքում ամենաքիչ դատավորներ ունեցող պետությունն է:

«Բոլորը բողոքում են, որ դատական գործերը երկար են քննվում, հաստիքների խնդիր կա, արդեն Վարչական դատարանում 2021 թվականին են նիստեր նշանակվում, որն է մերժման տրամաբանությունը»,-ասաց Վարդանյանը` դիմելով ֆինանսների նախարար Ատոմ Ջանջուղազյանին:

Ֆինանսների նախարարն արձագանքեց, որ օրենքով նախատեսված թվի մասին է խոսքը, և ենթադրվում է, որ օրենքով էլ պետք է վերանայվի հաստիքացուցակը, ապա նոր բյուջեում ներկայացվի: Ջանջուղազյանի խոսքով` այժմ բյուջեում արտացոլված է 244 դատավորի հաստիքացուցակ, եթե այն ավելացվի, փոփոխություններն էլ արտացոլված կլինեն բյուջեի նախագծում:

Վլադիմիր Վարդանյանն արձագանքեց, որ պատրաստ է համապատասխան օրենսդրական նախաձեռնությամբ հանդես գալ, եթե դրա կարիքը կա:

Կարեն Փոլադյանն ասաց, որ Դատական օրենսգիրքը սահմանում է դատավորների քանակը, Բարձրագույն դատական խորհուրդն ունի լիազորություն՝ քանակի ավելացման վերաբերյալ առաջարկով հանդես գալու։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։