Հոկտեմբերի 30-ին արտաքին գործերի նախարարի տեղակալ Գրիգոր Հովհաննիսյանն ընդունեց ԱՄՆ պետքարտուղարության Կովկասի ու տարածաշրջանային հակամարտությունների գրասենյակի տնօրեն Շերիլ Ֆերնանդեսին և Հայաստանում ԱՄՆ դեսպանության պատվիրակությանը: Այս մասին տեղեկացնում է ԱԳՆ մամուլի ծառայությունը։

Գրիգոր Հովհաննիսյանն անդրադարձավ Հայոց ցեղասպանության ճանաչման վերաբերյալ ԱՄՆ Կոնգրեսի ներկայացուցիչների պալատի կողմից բանաձևի ընդունմանը` նշելով, որ այն հզոր քայլ է պատմական արդարության ու ճշմարտության ուղղությամբ:

Ըստ հաղորդագրության՝ հանդիպման ընթացքում քննարկվեցին մայիսի 7-ին Երևանում տեղի ունեցած Հայ-ամերիկյան ռազմավարական երկխոսության նիստի արդյունքներն ու ձեռք բերված պայմանավորվածությունների կատարման ընթացքը: Կողմերը պայմանավորվեցին շարունակել աշխատանքները երկկողմ օրակարգի մի շարք հարցերի շուրջ` Հայաստան-ԱՄՆ համագործակցության ընդլայնման ուղղությամբ: