HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Վարուժան Ավետիսյանը ցուցմունք տվեց զինված ապստամբության պատճառների, ՊՊԾ գնդում ոստիկանների սպանության հանգամանքների մասին

ՊՊԾ գնդի գրավման գործով դատական նիստին այսօր ցուցմունք տվեց ամբաստանյալ Վարուժան Ավետիսյանը: Վերջինս ցուցմունքը սկսեց Ոստիկանության էրեբունու ՊՊԾ գունդը գրավելուն՝ 2016 թվականի հուլիսի 17-ին նախորդող ժամանակշրջանում տեղի ունեցած իրադարձություններից:

Ավետիսյանը հիշեցրեց, որ ինքը նախկին զինվորական է, մասնագիտությամբ՝ իրավաբան, մինչև 2013 թվականի հունվարը ծառայել է զինված ուժերում, և իր  ծառայությունն ուղիղ կերպով կապված է եղել ռազմավարական բնույթի որոշումների հետ:

«Ես ուղիղ կերպով ականատես էի լինում դրանց խիստ բացասական հետևանքներին: Տարիներ շարունակ փորձել եմ իմ պաշտոնի բերումով տարատեսակ ղեկավար օղակներում գտնվող բարձրաստիճան պաշտոնատար անձանց համապատասխան զեկուցագրեր ուղարկելու միջոցով ցույց տալ մեր բանակի աղետալի վիճակը դա շտկելու համար: Հետո հասկացա, որ այդ ջանքներն ապարդյուն են. մենք գործ ունենք ոչ միայն ապաշնորհ ղեկավարության, այլ նաև պետությունը զավթած բանդայի հետ, և նրանց որևէ առաջարկություն ներկայացնել կամ հորդորելը դրական արդյունքի բերել չի կարող: Ավելին, այդ առաջարկությւոնների շնորհիվ նրանք կատարելգործում էին իրենց դիվային մեքենան»,- ասաց Վարուժան Ավետիսյանը:

Վերջինս նշեց, որ 2011 թվականից ինքը եղել է «Սարդարապատ» շարժման անդամ, ղեկավարությունն իմացել է, բայց աչք փակել դրա վրա, քանի որ ինքն ասել է, որ եթե խոչընդոտեն իրեն, կթողնի զինվորական ծառայությունն ու հայտարարություններով հանդես կգա: Հետագայում Ավետիսյանն ինքն է հրաժարվել զինվորական ծառայությունից, եղել «Նախախորհրդարան»-ի, ապա` «Հիմնադիր խորհրդարան»-ի կազմում:

Ավետիսյանը հիշեցրեց «Հիմնադիր խորհրդարան»-ի անդամների` դեպի Արցախ երթը խոչընդոտելու և քաղաքացիների նկատմամբ բռնություն գործադրելու իրադարձությունները: Վերջինս նշեց, որ «Հիմնադիր խորհրդարան»-ն իր առջև դրել էր նախկին իշխանությունների հեռացման խնդիր:

«Ռեժիմի հեռացման մեթոդը քաղաքացիական անհնազանդությունն էր, և որևէ մեկի մտքով չէր անցնում զինված գործողությունների դիմել»,- ասաց Ավետիսյանը:

Վերջինս հիշեց նաև, որ Հայոց ցեղասպանության 100-րդ տարելիցի իրադարձություններից առաջ իրեն, Պավել Մանուկյանին, Ժիրայր Սեֆիլյանին և «Հիմնադիր խորհրդարանի»  այլ անդամների կալանավորել են` ապրիլի 24-ին նախատեսված իրենց հանրահավաքները  ձախողելու նպատակով, ապա ապրիլի 24-ից կարճ ժամանակ անց ազատ են արձակվել: Հետագայում տեղի են ունեցել 2016-ի ապրիլյան պատերազմի իրադարձությունները:

«Մենք հասկացանք, որ ռեժիմն ունակ է ուղիղ ձևով` պայմանավորված պատերազմի միջոցով ազգային դավաճանության: Փառք Աստծո` սահմանին մենք ունեինք բացառիկ արիությամբ օժտված սպաներ և զինվորներ, որոնք իրենց կյանքի գնով խափանեցին ազգային աղետը»,- ասաց Վարուժան Ավետիսյանը` կարծիք հայտնելով, որ ըստ պլանի` նախատեսված էր քայքայել պաշտպանության համակարգը, որից հետո Ռուսաստանը պիտի օգնության գար և հնարավորություն ստանար Արցախի ազատագրված տարածքները զիջելու դիմաց խաղաղապահ ուժեր տեղայակել Արցախում:

«Ազգային շահի իրացման համար գոյություն ունեցող կառավարիչների խումբը իրականում ազգային դավաճանության միջոցով երեք օտար պետության` նաև  Թուրքիայի շահերը սպասարկելու համար իր իշխանությունը երկարաձգելու նպատակ էր հետապնդում»,- ասաց Վարուժան Ավետիսյանը:

Վերջինս հիշեցրեց, որ Ապրիլյան պատերազմից հետո հայկական կողմը 800 հա հող է կորցրել և ասաց, որ դրանից հետո Ժիրայր Սեֆիլյանը նախաձեռնությամբ է հանդես եկավ` հավաքագրելով կամավորական գումարտակ և դիմեով զինված ուժերին, որպեսզի զենք, հանդերձանք տրամադրվի` զինված գործողություններ գլուխ բերելու և դիրքերը նորից ազատագրելու համար, սակայն մերժում են ստացել:

«1000-ից ավել մարդ կամավորագրեվեց այդ գործին, և տեսնելով, որ երևույթը թափ է առնում, գիտակցելով դրա աղետալի քաղաքական հետևանքներն իր համար` Սերժ Սարգսյանը Սեֆիլյանին նորից շինծու գործով կալանավորել տվեց...Եթե մենք չտեսնեինք ապրիլյան դավադիր պատերազմը և դրա հետևանքները և ռազմաքաղաքական ղեկավարության հետևողական քայլերը` մոտավորապես նույն սցենարով գլուխ բերելու Արցախի տարածքների հանձնումը հազարավոր զինվորների և քաղաքացիների կյանքի գնով, մենք, բնականաբար կշարունակեինք հակված մնալ խաղաղ անհնազանդության մեթոդով ռեժիմին հեռացնելուն, բայց ընտրության այլ հնարավորություն չկար: Մենք դիմեցինք զինված ապստամբության»,- ասաց Վարուժան Ավետիսյանը:

Անդրադառնալով ՊՊԾ գնդում տեղի ունեցած իրադարձություններին` Վարուժան Ավետիսյանն ասաց, որ Արմեն Բիլյանը ոստիկան Գագիկ Մկրտչյանին վիրավորելու վայրում ներկա չի եղել:

«Բիլյան Արմենը երկրորդ ոստիկանի վիրավորվելու վայրում ֆիզիկապես չի եղել, նա եղել է հսկիչ անցագրային կետում, նրա ձեռքին զենք չի եղել, և ես անձամբ Գագիկ Մկրտչյանին տեսել եմ երեք հարկանի մասնաշենք մտնելու մուտքի դիմաց: Նա ասֆալտին նստած էր, և աջ ձեռքով բռնել էր ձախ ձեռքը»,- ասաց Վարուժան Ավետիսյանը` նշելով որ ինքը մոտեցել է նրան` օգնության ցույց տալու համար, սակայն հետո նրան են մոտեցել խմբի այլ անդամներ, ու ինքը մտել է շենք:

«Շենքում քննությանը հետաքրքրող որևէ հետաքրքիր բան տեղի չի ունեցել, ես միացրել եմ համակարգիչս և տարածել հայտնի հայտարաությունը. «Մենք սկսել ենք զինված ապստամբություն, միացե՛ք»,- ասաց Վարուժան Ավետիսյանը:

Արմեն Բիլյանի վերաբերյալ Վարուժան Ավետիսյանի խոսքերից  հետո Պավել Մանուկյանը հիշեցրեց՝ ինքը ժամանակին հայտարարել է, որ Գագիկ Մկրտչյանը ոչ թե Արմեն Բիլյանի, այլ մեկ այլ ամբաստանյալ՝ Էդվարդ Գրիգորյանի պատահական կրակոցից է վիրավորվել, և Վարուժան Ավետիսյանին հարց ուղղեց, թե ինչո՞ւ է վերջինս Բիլյանի վերաբերյալ հայտարարությունն անում միայն հիմա, և իր հայտարարությունն անելու ժամանակ չի ասել, որ ինքը ճիշտ է ասում:

«Նախ ես հիմա եմ ցուցմունք տալիս, և հետո Ձեր հայտարարության միայն մի մասն է իրականությանը համապատասխանում` Արմեն Բիլյանի մասով: Գաղտնիք չէ, որ ես իմ հրապարակային հայտարարություններում բազմիցս ասել եմ, որ Արմեն Բիլյանն այդտեղ չի եղել»,- ասաց Վարուժան Ավետիսյանը:

Անդրադառնալով Յուրի Տեփանոսյանի սպանության հանգամանքներին` Վարուժան Ավետիսյանը նշեց, որ Տեփանոսյանի մահվան օրը խումբը որևէ կրակոց չի արձակել:

«Յուրի Տեփանոսյանին սպանել են Սերժ Սարգսյանի ուղիղ հրահանգով, ամենայն հավանականությամբ հրանագը փոխանցվել է այն ժամանակվա ոստիկանապետ Վլադիմիր Գասպարյանի միջոցով և ըստ այդմ` իրականացվել: Ճիշտ նույն՝ մարտի 1-ի սցենարով, երբ ոստիկանության ներքին զորքերի ոստիկան Տիգրան Աբգարյանը զոհաբերվեց, որպեսզի հնարավոր լինի արտակարգ դրություն մտցնել: Ինձ ուղղակի և՛ տարակուսանք և՛ ցավ է պատճառում այն հանգամանքը, որ այսօր էլ ազգադավ և հանցագործ ռեժիմի հեռացումից հետո մնում է նույն անհեթեթ մեղադրանքը, և պետությունը որևէ ջանք չի գործադրում երեք ոստիկանների մահվան հանգամանքները կոնտեքստային քննության միջոցով իրապես պարզելու, ապացույցները կեղծած պաշտոնյաներին և փորձագետներին պատասխանատվության ենթարակելու համար»,- ասաց Ավետիսյանն ու համոզմունք հայտնեց, որ ոստիկաների մահվան հանգամանքները պետք է լուրջ և հանգամանալից քննության առարկա դառնան, իսկ մյուս մեղադրյալներին առաջադրված մեղադրանքներից պետությունը պետք է հրաժարվի:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։