Արտակարգ իրավիճակների նախարարությունն (ԱԻՆ) առաջարկում է փոխհատուցել Ռուսաստանում Հայաստանի ԱԻՆ ներկայացուցչի և նրա հետ համատեղ բնակվող ընտանիքի անդամի օտարերկրյա պետությունում ծառայության ծախսերը։ Այդ թվում՝ փոխհատուցել բնակելի տարածության վարձակալության, Ռուսաստանի Դաշնություն մեկնելու և Հայաստան վերադառնալու ճանապարհածախսը։

Նման առաջարկություն է ներկայացրել Հայաստանի արտակարգ իրավիճակների նախարարությունը իրավական ակտերի նախագծերի հրապարակման միասնական կայքում։

Նախարարությունն ընդգծել է, որ Ռուսաստանի Դաշնությունում Հայաստանի դեսպանությանը կից Արտակարգ իրավիճակների նախարարության ներկայացուցչի պահպանման՝ բնակարանի վարձակալության, ճանապարհածախս և այլ ծախսերի փոխհատուցման համար պետական բյուջեից լրացուցիչ միջոցներ չեն հատկացվում։ Այդ ծախսերը կատարվում են յուրաքանչյուր տարի՝ ԱԻՆ-ին հատկացվող ընդհանուր միջոցների հաշվին: Իսկ նախարարությունը ներկայացուցչին տրամադրում է միայն վարձատրության ծախսերը՝ աշխատավարձ, պարգևատրում:

Նախարարության հաշվարկներով՝ ներկայացուցչի ծախսերի փոխհատուցման նպատակով 2020 թվականի պետական բյուջեով կհատկացվի մոտ 27 միլիոն դրամ։