Կառավարությունն այսօրվա նիստին որոշեց, որ Հնդկաստանի քաղաքացիները  Հայաստանի մուտքի վիզա կարող են ստանալ օտարերկրյա պետություններում Հայաստանի դիվանագիտական ներկայացուցչություններում և հյուպատոսական հիմնարկներում՝ նաև առանց հրավերի:

Իսկ Հնդկաստանի այն քաղաքացիները, ովքեր ունեն կացության կարգավիճակ Արաբական Միացյալ Էմիրություններում, Բահրեյնի Թագավորությունում, Կատարում, Քուվեյթում  և Օմանի Սուլթանությունում, կամ ունեն Ամերիկայի Միացյալ Նահանգների, Միացյալ Թագավորության, Կանադայի, Շենգենյան համաձայնագրի երկրների, Ռուսաստանի Դաշնության, Ավստրալիայի, Նոր Զելանդիայի, Կորեայի Հանրապետության և Ճապոնիայի գործող բազմակի մուտքի արտոնագրեր և կացության կարգավիճակ, Հայաստան մուտքի վիզա կարող են ստանալ Հայաստանի պետական սահմանի անցման կետերում։

«Որոշման նպատակն է կանոնակարգել Հնդկաստանի Հանրապետության քաղաքացիներին մուտքի վիզայի տրամադրումը՝ տարբերակելով նախքան ժամանումը մուտքի վիզա ստանալու և ժամանումից հետո սահմանային անցակետում դրա տրամադրման դեպքերը և պայմանները՝ ապահովելով միգրացիոն հոսքերի պատշաճ կառավարումը»,-կառավարություն ներկայացված որոշման նախագծում նշել է արտաքին գործերի նախարարությունը։ 

Նախարարությունը նախատեսում է այս որոշման ընդունմանը զուգահեռ հնդկական կողմի հետ բանակցել և կնքել աշխատանքային միգրացիայի և հետընդունման հարցերը կարգավորող միջազգային պայմանագրեր, որոնք առավել համապարփակ ձևով կկարգավորեն Հնդկաստանի  քաղաքացիների՝ Հայաստանի տարածքում կացությանը վերաբերող իրավահարաբերությունները: