Մասիս քաղաքի Կայարան թաղամասի Սայաթ-Նովա 11 հասցեի փայտե շինության մեջ բնակվում է 1988 թվականին Սումգայիթից ու Բաքվից բռնագաղթած 5 ընտանիք:

Երեսուն տարի առաջ նրանց կացարան է տրամադրել «Վոդրեմ-60» շինարարական ընկերությունը, որտեղ նրանք աշխատանք էին գտել:

Ընկերության սնանկանալուց ու փակվելուց հետո բնակիչները շարունակում են ապրել փայտե տնակում, որը այժմ պատկանում է Կարեն Ասրյանին:

Նախկինում տարածքում եղել են մի քանի տնակներ, որոնցից միայն մեկն է մնացել:

2005-ին Քաղաքաշինության նախարարությունը բնակիչներին տրամադրվել է բնակարանի գնման վկայագիր:

Բնակիչ Ռաջ Սարգսյանի խոսքով՝ մի քանի ընտանիք կարողացել է բնակարաններ ձեռք բերել ու հեռացել է տարածքից: Մնացածներն այդ գնով չեն կարողացել բնակարան գտնել:

«Դատարկ հողատարածքն էր 5000 դոլար, դրա համար էլ մենք վկայագիրը հետ տվեցինք»,- ասում է Ռաջ Սարգսյանը:

Հիմա երկհարկանի փայտե շինության մեջ  բնակվում է հինգ ընտանիք: Նրանցից երեքը ընգրկված է Միգրացիոն ծառայության բնակապահովության առաջնահերթ ծրագրում:

Բնակիչներն ասում են, որ տարիներ շարունակ բազմաթիվ նամակներ են գրել տարբեր գերատեսչություններ:

«Միայն այս տարվա ընթացքում 4-5 նամակ ենք գրել՝ հասցեագրված Նիկոլ Փաշինյանին, Տարածքային կառավարման և զարգացման նախարարությանը»,- ասում է բնակիչ Լյուդմիլա Առաքելովան:

Տարածքային կառավարման և զարգացման նախարարությունը պատասխանել է բնակիչ Իրինա Սարգսյանի նամակին, որտեղ նշված է, որ դիմումը քննարկվել է Արարատի մարզպետարանի և Միգրացիոն ծառայության հետ: Վերջինս 2005 թվականից ամեն տարվա բյուջետային հայտում Կառավարությանը ներկայացնում է համապատասխան գումարի պահանջ, սակայն ծրագիրը չի ֆինանսավորվում:

Անյա Սարկիսովա, Գայանե Հովսեփյան

ԵՊՀ ժուռնալիստիկայի ֆակուլտետի ուսանողներ