Երևան քաղաքի ընդհանուր իրավասության դատարանում՝ նախագահությամբ դատավոր Վարդան Գրիգորյանի, այսօր սկսվեց Ազգային ժողովի ԲՀԿ խմբակցության պատգամավոր Էդուարդ Բաբայանի վերաբերյալ գործով սուտ ցուցմունք տալու մեջ մեղադրվող Վյաչեսլավ Հարությունովի գործի քննությունը: Հարությունովը տուժող է եղել Բաբայանի վերաբերյալ քրեական գործով: Ըստ Բաբայանի վերաբերյալ քրեական գործի՝ «Օլիմպավան» մարզական համալիրում Էդուարդ Բաբայանը նրան բազմաթիվ հարվածներ է հասցրել՝ նրա առողջությանը դիտավորությամբ ծանր վնաս հասցնելով:

«Օլիմպավան»-ում տեղի ունեցած միջադեպից հետո ոստիկանությունը հաղորդագրություն էր տարածել այն մասին, որ տուժողի, այսինքն՝ Վյաչեսլավ Հարությունովի հաղորդման համաձայն՝ նրան նախ «հարված է հասցրել Գագիկ Ծառուկյանը, ապա ձեռքերով և ոտքերով բազմաթիվ հարվածներ են հասցրել Գագիկ Ծառուկյանի անվտանգության ղեկավար՝ 46-ամյա Էդուարդ Բաբայանն ու ևս մեկ անձ, որի ինքնությունը պարզվում է»:

Հետագայում Վյաչեսլավ Հարությունովը փոխել է ցուցմունքն ու հայտնել, թե սայթաքել ու վայր է ընկել, իրեն Բաբայանը չի հարվածել, իսկ Գագիկ Ծառուկանն իր «եղբայրն է»:

Միջադեպի առթիվ հարուցված քրեական գործի շրջանակներում քննություն է տարվել դրա ընթացքում Գագիկ Ծառուկյանի գործողությունները պարզելու և դրանց իրավական գնահատական տալու ուղղությամբ: Քննությամբ, թեև չի հերքվել Ծառուկյանի կողմից Վյաչեսլավ Հարությունովին մեկ անգամ հարվածելու հանգամանքը, Վճռաբեկ դատարանի հայտնած իրավական դիրքորոշման լույսի ներքո «ծեծ» որակվել չի կարող, ուստի Ծառուկյանի նկատմամբ քրեական հետապնդում չի իրականացվել, և գործը դատարան էր ուղարկվել միայն Էդուարդ Բաբայանի մասով:

Թեև Վյաչեսլավ Հարությունովը դատարանում ևս պնդել է, թե Բաբայանն իրեն չի հարվածել, որ ինքն իրեն տուժող չի համարում, Էդուարդ Բաբայանը մեղավոր է ճանաչվել: Պատգամավորի վերաբերյալ դատավճիռը մտել է օրինական ուժի մեջ, որից հետո արդեն Հարությունովի նկատմամբ քրեական  հետապնդում է սկսվել սուտ ցուցմունք տալու հոդվածով: Ըստ մեղադրանքի՝ Հարությունովը սուտ ցուցմունքներ է տվել գործի թե՛ նախաքննության, և թե՛ դատաքննության ընթացքում:

Այսօրվա դատական նիստի ընթացքում Հարությունովի պաշտպան Ռոման Սարգսյանը միջնորդեց դատարան հրավիրել և հարցաքննել ԱԺ ԲՀԿ խմակցության պատգամավորներ Գագիկ Ծառուկյանին, Իվետա Տոնոյանին, Էդուարդ Բաբայանին, Սպորտի և երիտասարդության հարցերի նախկին նախարար Հրաչյա Ռոստոմյանին և այլ անձանց: Սարգսյանի խոսքով՝ նրանց՝ նախաքննության ընթացքում տված ցուցմունքներում էական հակասություններ են եղել, որոնք չեն պարզաբանվել, նախաքննության ընթացքում նրանց մասնակցությամբ առերեսումներ չեն իրականացվել, նրանք չեն ներառվել նաև Էդուարդ Բաբայանի գործով դատակոչի ցուցակում:

Բացի այդ՝ պաշտպանը միջնորդեց նաև Երևան քաղաքի ընդհանուր իրավասության դատարանից պահանջել Էդուարդ Բաբայանի վերաբերյալ գործի նյութերը:

Միջնորդությունների դեմ մեղադրող դատախազ Վարդգես Սարգսյանն առարկեց. ըստ դատախազի՝ Էդուարդ Բաբայանի վերաբերյալ դատական ակտն արդեն օրինական ուժի է մեջ է մտել, և դրանով անցնող անձանց ցուցունքները չեն կարող քննարկման առարկա դառնալ:

Դատախազը նկատեց՝ տուժողի կարգավիճակ ունեցող Վյաչեսլավ Հարությունովը դատաքննության ամբողջ ընթացքում հանդես է եկել որպես «պաշտպանական կողմ»՝ ամեն ինչ անելով, որպեսզի ապացուցի, որ Էդուարդ Բաբայանը բռնություն չի գործադրել իր նկատմամբ, որ Գագիկ Ծառուկյանն իր ավագ եղբայրն է, ում հետ որևէ կոնֆլիկտ չունի:

Վյաչեսլավ Հարությունովի պաշտպանը դատարանում հայտնեց նաև, որ Հարությունովը բավարար իրավական գիտելիք չունենալու պատճառով չի բողոքարկել Էդուարդ Բաբայանի գործով դատավճիռը, որի արդյունքում այն օրինական ուժի մեջ է մտել և հիմք դարձել իր նկատմամբ քրեական հետապնդում սկսելու համար: Մեղադրող Սարգսյանն, այս հանգամանքին անդրադառնալով, հիշեցրեց, որ Վյաչեսլավ Հարությունովը ներկայացուցիչ է ունեցել դատարանում, ով բավարար իրավական գիտելիքներ է ունեցել:

Դատավորը մերժեց Հարությունովի պաշտպանի միջնորդությունը՝ պատգամավորներին և այլ անձանց դատակոչի ցուցակում ներառելու և հարցաքննելու մասին, ինչ վերաբերում է Էդուարդ Բաբայանի գործը պահանջելուն, դատավոր Գրիգորյանը նշեց, որ այդ գործն արդեն իսկ առկա է Վյաչեսլավ Հարությունովի վերաբերյալ քրեական գործում, և պահանջելու անհրաժեշտություն չկա:

Հարությունովի պաշտպան Ռոման Սարգսյանը հայտնեց, որ դատախազ Վարդգես Սարգսյանին բացարկի միջնորդություն ունի, դատավորը պահանջեց միջնորդությունը գրավոր ներկայացնել, որից հետո նիստը հետաձգվեց մինչև դեկտեմբերի 11-ը: