«Արտյոմ Կանևսկոյ» անունով հայտնի Արտյոմ Հարությունովի գործով դատական նիստին նրա վարած մեքենայի զննությանը մասնակցած թարգմանիչ Արթուր Մովսիսյանի ներկայությունն ապահովել չի ստացվում: Գործով նախորդ դատական նիստին դատարանը ծանուցագիր էր ուղարկել թարգմանչի հասցեով, սակայն ծանուցագիրը վերադարձվել է «տեղափոխված է» նշումով:

Երևան քաղաքի ընդհանուր իրավասության դատարանում նոյմբերի 20-ին նշանակված էր Կանևսկոյի գործով հերթական դատական նիստը, որի ընթացքում նիստերի քարտուղարն ասաց, որ կապ են հաստատել թարգմանչական գրասենյակի հետ, որտեղ Արտյոմ  Հարությունովին բերման ենթարկելու ժամանակ` 2019-ի հունվարի 12-ի դրությամբ, աշխատելիս է եղել թարգմանիչ Արթուր Սարգսյանը: Գրասենյակից հայտնել են, որ վերջինս այլևս իրենց մոտ չի աշխատում, բայց տվել են իրենց մոտ գրանցած նրա հեռախոսահամարը։ Դատարանի աշխատակազմը կապ է հաստատել թարգմանչի հետ, վերջինս հայտնել է, որ հնարավորության դեպքում կներկայանա նիստին: Դատարանի աշխատակազմից փորձել են ճշտել թարգմանչի բնակության հասցեն` ծանուցագիր ուղարկելու համար, սակայն հայտնել է, որ չի կարող հասցեն նշել, քանի որ տարբեր վայրերում է լինում:

Դատական նիստից առաջ դատարանի աշխատակազմը ևս մեկ անգամ զանգահարել էր թարգմանչի հեռախոսահամարին: Նա հայտնել էր, որ ճանապարհին է, կփորձի ներկայանալ, իսկ եթե չստացվի, ապա կներկայանա հաջորդ դատական նիստին: Դրանից հետո թարգմանչի հեռախոսահամարն անհասանելի է դարձել, ու դատարանի աշխատակազմին այլևս չի հաջողվել կապ հաստատել նրա հետ, վերջինս այսպես էլ չեկավ դատարան:

Դատավոր Մնացական Մարտիրոսյանը նշեց, որ դատարանն անգամ չունի հավաստիացում այն մասին, որ հեռախոսահամարին պատասխանած անձն իսկապես թարգմանիչն է եղել:

Նշենք, որ թարգմանիչ Մովսիսյանը դատակոչի ցուցակում ներառված չի եղել: Նրան դատարան հրավիրելու և հարցաքննելու վերաբերյալ միջնորդությունը ներկայացրել է Կանևսկոյի պաշտպան Հովսեփ Սարգսյանը, և դատարանը բավարարել է միջնորդությունը: Կանևսկոյի պաշտպանները  պնդում են, որ թարգմանչի ներգրավումը քրեական գործում եղել է խախտումներով ու կասկած հայտնում, որ նա վարույթն իրականացնող մարմնի «թաքնված աշխատակից է»:

Պաշտպանների խոսքով` երբ Կանևսկոյին բերման են ենթարկել ոստիկանություն, իրենց թույլ չեն տվել հանդիպել նրան իրավական աջակցություն ցույց տալու համար: Ըստ պաշտպանների` այն ժամանակ, երբ իրենք դրսում սպասելիս են եղել, թարգմանիչ Մովսիսյանը ևս սպասելիս է եղել, նրան նույնպես ներս մտնել չեն թույլատրել, ապա իրենց համար անհայտ ճանապարհով թարգմանչին մտցրել են ոստիկանության շենքի բակ: Այստեղ թարգմանիչը, ըստ քրեական գործի նյութերի, մասնակցել է շենքի բակում գտնվող մեքենայի զննությանը, որը մինչև բերման ենթարկվելը վարելիս է եղել Արտյոմ Կանևսկոյը:

Պաշտպանները նաև ասում են, որ ըստ քրեական գործի` թարգմանիչ Մովսիսյանը գործում ներգրավվել է հունվարի 13-ին, բայց հունվարի 12-ին, դարձյալ ըստ քրեական գործում առկա տվյալների, մասնակցել է մեքենայի զննությանն ու ստորագրել զննության արձանագրության տակ:

Վերը նշված հանգամանքների վերաբերյալ պարզաբանումներ ստանալու համար է, որ պաշտպանները ցանկանում են հարցեր տալ թարգմանչին:

Նոյեմբերի 20-ի դատական նիստը հետաձգվեց, և հաջորդը նշանակվեց նոյեմբերի 27-ին:

Լուսանկարում` դատավոր Մնացական Մարտիրոսյանը