Կառավարությունը երեք մարզում տարածք հատկացրեց Արդարադատության նախարարությանը՝ դատական ակտերի հարկադիր կատարումն (ԴԱՀԿ) ապահովող ծառայության տարածքային ստորաբաժանումներ հիմնելու համար:

Ըստ որոշման նախագծի՝ ծառայության գրասենյակները կհիմնվեն Գորիս քաղաքի Տաթևացու 9/1, Արմավիր քաղաքի Մյասնիկյան 15ա/1 և Սևան քաղաքի Նաիրյան 1-ին հասցեներում:

Արդարադատության նախարարության հաղորդմամբ՝ դատական ակտերի հարկադիր կատարումն ապահովող ծառայության Արմավիրի և Գորիսի տարածքային ստորաբաժանումներն իրենց աշխատանքային գործունեությունն իրականացնում են վարձակալած տարածքներում: Իսկ Գեղարքունիքի մարզային բաժինն, առանց իրավական հիմքերի, 2001 թվականից զբաղեցնում է Վիճակագրական կոմիտեի տնօրինման ենթակայությամբ գտնվող Սևանի Նաիրյան 1-ին նրբանցք շենքի 2-րդ հարկը: Գլխավոր հարկադիր կատարողը դեռեւս նախորդ տարի գրությամբ դիմել էր Արդարադատության նախարարություն՝ առաջարկելով այդ տարածքը Ծառայությանը տրամադրել: