Համաշխարհային բանկը ֆինանսավորել է «Պետական հատվածի արդիականացման երրորդ ծրագրի» շրջանակում Տնտեսական մրցակցության պաշտպանության պետական հանձնաժողովում իրականացվելիք բարեփոխումների աշխատանքները:

ՏՄՊՊ Հանձնաժողովի նախագահ Գեղամ Գևորգյանն այսօր ընդունել է Համաշխարհային բանկի պատվիրակությանը՝ Միգարա դե Սիլվայի գլխավորությամբ եւ շնորհակալություն հայտնել աջակցության համար: 

«Ծրագիրը մեզ համար կենսական նշանակություն ունի: Խնդիր ենք դրել դրա շրջանակում իրականացնել մի շարք բարեփոխումներ, որոնք շոշափելի արդյունքներ կտան և կնպաստեն մեր գործունեության արդյունավետության բարձրացմանը»,- տարածած մամուլի հաղորդագրության համաձայն` նշել է Գեղամ Գևորգյանը:

Զրուցակիցները, մասնավորապես, կարևորել են թվային հարթակի ստեղծումը, որի արդյունքում  կբարելավվի ներքին վարչարարությունը, էականորեն կկրճատվեն տնտեսվարողների կողմից մրցակցային մարմնին դիմելու և պատասխաններ ստանալու ժամկետները, որոշումների կայացման գործընթացը կդառնա էլ ավելի թափանցիկ:

«ԵԱՏՄ-ում ևս սկսվել է թվայնացման գործընթացը մրցակցության ոլորտում,  և  ես շատ եմ ցանկանում, որ հենց Հայաստանն այս առումով  լինի առաջամարտիկը: Իհարկե,  այդ ցանկությունը բավականին հավակնոտ է, սակայն կարծում եմ, որ մեր ուժերի սահմաններում է»,- հավելել է ՏՄՊՊՀ նախագահը: