Կառավարությունն այսօրվա նիստին որոշեց Տավուշի մարզում ստեղծել Մարդու իրավունքների պաշտպանի գրասենյակի (ՄԻՊ) ստորաբաժանում։ Այդ նպատակով գործադիրը մոտ 2․7 միլիոն դրամ հատկացրեց ՄԻՊ-ին։

«Պաշտպանի աշխատակազմում Տավուշի մարզային ստորաբաժանման ստեղծումը կմեծացնի Մարդու իրավունքների պաշտպանի ինստիտուցիոնալ ազդեցությունը երկրի իրավական համակարգում»,- կառավարությանը հայտնել է Մարդու իրավունքների պաշտպանի գրասենյակը։

Հատկացվող գումարը նախատեսվում է ձեռք բերել գրասենյակային կահույք, համակարգչային տեխնիկա և նոյեմբեր-դեկտեմբեր ամիսների աշխատավարձերը վճարել։

Մարդու իրավունքների պաշտպանի գրասենյակը ընդգծել է, որ վերջին տարիներին զգալի աճել է նաև Տավուշի մարզից հասցեագրվող դիմում-բողոքների թիվը: Բացի այդ, Տավուշի մարզի սահմանամերձ գյուղերում փաստահավաք աշխատանքներ կատարելու համար անհրաժեշտություն է առաջանում աշխատողներ գործուղել Երևանից և (կամ) Գեղարքունիքի մարզային ստորաբաժանումից։

«Մինչդեռ, այսպիսի իրավիճակը չի նպաստում աշխատանքների օպերատիվության և արդյունավետության բարձրացմանը։ Ստեղծված իրավիճակում մարդու իրավունքների պաշտպանի աշխատակազմի արդյունավետ գործունեությունն ապահովելու համար անհրաժեշտ է Տավուշում մարզային ստորաբաժանում ստեղծել»,-ընդգծել է ՄԻՊ-ը։

Լուսանկարը՝ ՄԻՊ-ի ֆեյսբուքյան էջից