Ոստիկանության և ԱԱԾ փոխգործակցության արդյունքում փաստական տվյալներ են ձեռռք բերվել, որ մի տղամարդու ապօրինի հրազենն օրինականացնելու համար անհրաժեշտ փաստաթղթեր պատրաստելու և դրանց հիման վրա սահմանված կարգով հրազենը գրանցելու դիմաց ոստիկանության Արմավիրի բաժնի թույլտվության համակարգի տեսուչը քաղաքացուց որպես կաշառք պահանջել է 55 հազար դրամ: 

Ոստիկանությունը հայտնում է, որ ԿՀԴՊ գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչության ծառայողները, ձեռնարկված օպերատիվ-հետախուզական միջոցառումների արդյունքում, կաշառքի առարկա հանդիսացող 55 հազար դրամից 25 հազար դրամը ստանալուց անմիջապես հետո ոստիկանության Արմավիրի բաժնի թույլտվության համակարգի տեսուչին բռնել և բերման են ենթարկել: 

Դեպքի առթիվ քրեական գործ է հարուցվել, որն ուղարկվել է Հատուկ քննչական ծառայություն: 

Ոստիկանության ծառայողը ձերբակալվել է: