Նունե Հովսեփյան

Երեւանյան եւ Սեւանա լճերում հայտնաբերված վանադիումի առկայության մասին այսօր լրագրողների հետ հանդիպման ժամանակ պարզաբանումներ տվեցին ՀՀ բնապահպանության նախարարության Հայէկոմոնիտորինգ կենտրոն ՊՈԱԿ-ի տնօրենի տեղակալ Սեյրան Մինասյանը և ԵՊՀ պրոֆեսոր, բնապահպան Կարինե Դանիելյանը:

«Սևանա լճում վանադիումի պարունակությունը, խորհրդային նորմերի հետ համեմատած, գերազանցում է, հայկական նորմերով` ոչ: Նույնն է նաև Երևանյան լիճի վիճակը, միայն թե հայկական նորմերով` մի մասը բնական է, մի մասն անթրոպոգեն` աղտոտված»,- համոզված է Սեյրան Մինասյանը: Վերջինսի խոսքով` ամբողջ աշխարհում շաքարախտով հիվանդներին վանադիումի միացություն պարունակող հաբ են տալիս:

«Հիմա դա օգո՞ւտ է, թե՞ վնաս է: Դուք եկել հստակ պահանջում եք` Երևանյան լճում վանադիումի բարձր քանակությունը որքանո՞վ է վնաս: Հայէկոմոնիտորինգ կենտրոնը որևէ մեկնաբանություն չի տալիս. մենք դրա իրավունքը չունենք և մասնագետն էլ չենք: Մենք չափում ենք և պատասխանատու ենք, որ թիվ լինի»,- ասում է Սեյրան Մինասյանը:

«Մեր ընդերքը շատ հարուստ է ծանր մետաղներով: Այդ է պատճառը, որ ջրերում մի շարք մետաղների ֆոնային կոնցենտրացիաները` ներառյալ վանադիումը և մագնեզիումը, բարձր են»,- նշում է Կարինե Դանիելյանը: Հենվելով ոչ միայն նախարարության տվյալերի, այլեւ համապատասխան ակադեմիական ինստիտուտների, համալսարանական  ուսումնասի­րությունների վրա` բնապահպան Դանիելյանի նշում է՝ Սևանա լճում վանադիումի առկայությունը նորմալ է, ինչը չի կարելի ասել Երևանյան լճի մասին. «Երևանյան լիճն ուղղակի կոյուղի է բոլոր ցուցանիշներով, ոչ միայն վանադիումի»:

Պրոֆեսոր Դանիելյանի խոսքով` Երևանյան լճի համար մաքրման տարբեր ծրագրեր մշակվում են, հետո մնում են օդի մեջ` ֆինանսական, տեխնիկական դժվարությունների պատճառով: Սևանա լճի հետ կապված խնդիրներ դեռ շատ կան, բայց աշխատանքներ կատարվել են: Բնապահպանը կատարված աշխատաքներից կարևորում է լճի մակարդակի բարձրացումը: Վերջին ուսումնասիրությունները ցույց են տվել, որ ջրի թափանցիկությունը կենտրոնական մասում խիստ աճել է: Խնդիրներ կան ափամերձ տարածների մաքրման հետ կապված:

Սեյրան Մինասյանը մանրամասնեց, որ Հայաստանի լճերի աղտոտվածության մակարդակը միջազգային չափորոշիչներով չի որոշվում, այլ պարզապես համեմատվում է Սյունիքի մարզի Արևիկ գյուղից վերև գտնվող գետի ջրի բաղադրության հետ: