Խմբակցություններից յուրաքանչյուրի առաջարկները որքան լրացուցիչ ծախս են ենթադրում բյուջեի համար. Ջանջուղազյանը մանրամասնեց
Խորհրդարանում քննարկվում է 2020 թվականի պետական բյուջեի նախագիծը: Հիշեցնենք, որ նախագծի քննարկումներն ընդհատվել էին, քանի որ նախագիծն ուղարկվել էր գրավոր առաջարկների փուլ:
Ֆինանսների նախարար Ատոմ Ջանջուղազյանն իր ելույթում անդրադարձավ պատգամավորների ներկայացրած առաջարկներին, որոնց Կառավարությունը բացասական եզրակացություն է տվել:
Նախարարի խոսքով` Կառավարությունը ստացել է 160 առաջարկություն, որոնք գումարային առումով 368 միլիարդ դրամ ավելացնելու ծախս էին ենթադրում: Կառավարությունը չի գտել լուծումներ, թե ծախսի ավելացումն ինչի հաշվին է արվելու:
«Ըստ էության առաջարկների վերաբերյալ մոտեցումը եղել է այն, որ փորձենք ունենալ համակարգված մոտեցում` հատվածական նախաձեռնությունների քննարկման փոխարեն: Ձևավորվել է այն մոտեցումը, որ արդյունավետության հասնելու միակ ճանապարհը ծրագրային բյուջետավորման լիարժեք կիրառումն է»,- ասաց Ջանջուղազյանը:
ԱԺ տնտեսական հարցերի մշտական հանձնաժողովի նախագահ Բաբկեն Թունյանը հետաքրքրվեց, թե կա արդյոք վիճակագրություն` խմբակցություններից յուրաքանչյուրի առաջարկները որքան լրացուցիչ ծախս էին ենթադրում բյուջեի համար: Ատոմ Ջանջուղազյանն արձագանքեց` «Բարգավաճ Հայաստան» խմբակցության առաջարկները կազմել են 264,4 միլիարդ դրամ, «Լուսավոր Հայաստան» խմբակցության առաջարկները` 94,9 միլիարդ դրամ, «Իմ քայլի» ծախսերը` 8,4 միլիարդ դրամ:
Բաբկեն Թունյանն արձագանքեց` իր տեղեկություններով կա պատգամավոր, որի առաջարկները մի քանի տասնյակ միլիարդի ծախս է ենթադրում: Ատոմ Ջանջուղազյանը համաձայնեց:
Մեկնաբանել