Այսօր վարչապետ Նիկոլ Փաշինյանը «Թրանսփարենսի Ինթերնեշնլ» հակակոռուպցիոն կենտրոնի կազմակերպած Կոռուպցիայի դեմ պայքարի միջազգային օրվան նվիրված միջոցառման ժամանակ անդրադարձավ նաև բարձրաստիճան պաշտոնյաների պարգևատրման ֆոնդերով իր սահմանած բարձր վճարումների թեմային: Նշեց, որ վճարումների չափերը հայաստանյան չափանիշներով բարձր են: Դրա մեկնաբանությունն այն է, որ դա նաև պայքար է կոռուպցիայի դեմ կամ կոռուպցիայի կանխարգելման նպատակ ունի, ինչը բովանդակային առումով սխալ չէ:

«Ներողություն խնդրելով Կառավարության մեր բոլոր անդամներից և բոլոր այն պաշտոնյաներից, ում այս որոշումը վերաբերել է՝ պարզապես ես այս ձևակերպումն ուզում եմ անել, որպեսզի դրդապատճառները մեր հանրությանը և ներկաներին ավելի պարզ լինի: Այդ աշխատավարձ-վճարումների բարձրացումը ոչ թե արվել է կոռուպցիան կանխարգելելու իմաստով, որովհետև կոռուպցիոները 1.5 մլն դրամով, ինչպես մեր փորձը ցույց է տալիս, չի բավարարվելու, սա արվել է բոլորովին ուրիշ իմաստով: Երբ որ հնարավոր բոլոր այդ մարդկանց կոռուպցիոն գործերի մեջ ներքաշված լինելու համար ձերբակալենք, կալանավորենք և դատապարտենք, այդ ժամանակ խղճի խայթ չունենանք ընդհանրապես: Չասենք, որ այս մարդուն այնքան քիչ  ենք վճարել, որ նրան ուրիշ տարբերակ չենք թողել, քան գնալ տարբեր կոռուպցիոն գործարքներ փնտրել»,- ասում Է Նիկոլ Փաշինյանը:

Այդ առումով վարչապետն իր կայացրած որոշումն արդարացված է համարում:

Հիշեցնենք, որ «Հետք»-ն անդրադարձել էր վարչապետի հանձնարարականին, նշելով, որ վարչապետ Նիկոլ Փաշինյանի գաղտնի հանձնարարականով էականորեն բարձրացել են նախարարների, փոխնախարարների և նախարարությունների գլխավոր քարտուղարների աշխատավարձերը։ Հանձնարարականը տրվել է այս տարվա հուլիս ամսին։