HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Ռուստամ Բադասյանի համոզմամբ` նախագիծը ձեռքսեղմում է պետության և ՍԴ անդամների միջև

Խորհրդարանում քննարկվեց Սահմանադրական դատարանի անդամների կամավոր վաղ կենսաթոշակի անցնելու նախագիծը: Կառավարությունը փոփոխություններ է առաջարկել Սահմանադրական դատարանի մասին օրենքում:

 Նախագիծը ներկայացրեց արդարադատության նախարար Ռուստամ Բադասյանը:

«Այս նախագծով ներկայացվում է ՍԴ դատավորների կամավոր վաղ կենսաթոշակի անցնելու ինստիտուտը, սակայն սա նորություն չէ Հայաստանի իրավական համակարգում, գործող ՍԴ-ի մասին օրենքում նախատեսված է կամավոր վաղ կենսաթոշակի ինստիտուտը»,-ասաց նախարարը:

Առաջարկվող նախագծով` կամավոր վաղ կենսաթոշակի անցնելու դեպքում մինչև Սահմանադրության 213-րդ հոդվածով նախատեսված՝ Սահմանադրության 7-րդ գլխի ուժի մեջ մտնելը, Սահմանադրական դատարանի անդամ նշանակված և նույն գլխի ուժի մեջ մտնելուց հետո իրենց պաշտոնավարումը շարունակած անձինք կարող են դիմել վաղ կենսաթոշակի: Այս դեպքում ևս պահպանվում է վերջիններիս աշխատավարձի չափով վաղ կենսաթոշակ ստանալու իրավունքը:

Նախագծի համաձայն` վաղ կենսաթոշակի իրավունքը կարող է գործել ՍԴ դատավորների մինչև 2020 թվականի հունվարի 31-ը հրաժարական ներկայացնելու դեպքում:

«Լուսավոր Հայաստան» խմբակցութան քարտուղար Գևորգ Գորգիսյանը հետաքրքրվեց, թե նախագծի ընդունվելու և ՍԴ դատավորների վաղաժամ թոշակի գնալու դեպքում որքան գումար է հարկատուների վճարած հարկերից ծախսվելու «նման շռայլությունների համար»:

Արդարադատության նախարար Ռուստամ Բադասյանն արձագանքեց` եթե յոթ դատավորները միասին միանգամից հրաժարականի դիմում ներկայացնեն, ապա այդ վաղաժամ կենսաթոշակի ծախսերը կկազմեն շուրջ 630 միլիոն դրամ:

«Ինչ վերաբերում է հարցին, որ հարկատուների գումարից նման շռայլության ենք գնում, կարող եմ ասել, որ հասարակությունն ավելի անհանդուրժող կգտնվի, եթե ոչինչ չփոխենք դատական համակարգում, և ամեն ամիս իրենց վճարած հարկերից  դատավորներին աշխատավարձ վճարենք»,-ասաց Բադասյանը:

Անկախ պատգամավոր Արման Բաբաջանյանն էլ «հանցագործ» որակեց Սահմանդարական դատարանի գործող կազմին և ասաց, որ դեմ է` հանցագործ հանցագործ անդամներին վաղաժամ կենաթոշակի հնարավորություն ընձեռվի:

Նախարար Բադասյանը չհամաձայնեց պատգամավորի դիտարկման հետ, ասաց` չունի նման փաստեր վերջիններիս հանցագործ որակելու համար: Նախարարի խոսքով` սա ձեռքսեղմում է պետության և ՍԴ անդամների միջև:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter