Վերաքննիչ քրեական դատարանում, նախագահությամբ դատավոր Նարինե Հովակիմյանի, քիչ առաջ սկսվեց ԱԺ նախկին պատգամավոր, գեներալ Մանվել Գրիգորյանի նկատմամբ գրավ չկիրառելու առաջին ատյանի դատարանի որոշման դեմ նրա պաշտպանների բողոքի քննությունը:

Նշենք, որ առաջին ատյանի դատարանում՝ դատավոր Մնացական Մարտիրոսյանի վարույթում քննվող քրեական գործով Գրիգորյանի պաշտպանները բազմաթիվ միջնորդություններ են ներկայացրել նրան գրավի դիմաց ազատ արձակելու վերաբերյալ: Այսօր քննվող բողոքը վերաբերում է դատավոր Մնացական Մարտիրոսյանի՝ նոյեմբերի 5-ի որոշմանը:

Դատական նիստի մեկնարկին դատավոր Հովակիմյանը կողմերին հարցրեց, թե արդյոք առկա են դատավորին ինքնաբացարկ հայտնելու հիմքեր: Գրիգորյանի պաշտպան Լևոն Բաղդասարյանը մինչ այդ հարցին անդրադառնալը հարցրեց, թե ի՞նչ եղանակով է գործը մակագրվել Հովակիմյանին: Վերջինս պատասխանեց, որ Վերաքննիչ դատարանում գործերը մակագրվում են համակարգչային եղանակով: Դատավորին ինքնաբացարկի միջնորդություն չներկայացվեց:

Դատարանում այս պահին վերաքննիչ բողոք է ներկայացնում պաշտպան Լևոն Բաղդասարյանը: Վերջինս բարձրաձայնեց Մանվել Գրիգորյանի առողջական խնդիրների մասին, նշեց, որ անձին ազատությունից զրկելը պետք է փաստարկված լինի, մինչդեռ, ըստ պաշտպանի՝ առաջին ատյանի դատարանի դատական ակտում մատնանշված չեն Գրիգորյանին կալանքի տակ պահելու օրինական հիմքեր:

Նիստը շարունակվում է, մասնակցում է նաև Նազիկ Ամիրյանը՝ Մանվել Գրիգորյանի կինը, իսկ Գրիգորյանը դատարան չի բերվել: