Արմավիրի համայնքապետը մանկապարտեզի տնօրենին ազատել է աշխատանքից փոխքաղաքապետին «խոզապահ» ասելու համար
Արմավիր քաղաքի թիվ 8 մանկապարտեզի երեխաների ծնողներն այս պահին համայնքապետարանի շենքի մոտ են հավաքվել՝ իրենց բողոքի ձայնը բարձրացնելու համայնքապետի որոշման դեմ, ըստ որի աշխատանքից ազատել է մանկապարտեզի տնօրենին:
Տնօրենը՝ Թամարա Ավետիսյանը, մանկապարտեզում էր: Նա պատմեց, որ վիճարկելի հարցի շուրջ իրեն հրավիրել են համայնքապետարան: Աշխատանքային քննարկման ժամանակ համայնքապետարանի կրթության, գիտության, մշակույթի, սպորտի և երիտասարդական հարցերի բաժնի պետ Արաքսյա Դոլինյանը փոխքաղաքապետ Վարշամ Սարգսյանին ներկայացրել է, թե իբր իրեն Թ. Ավետիսյանը «բանատեղ չի դնում»:
«Այդ խոսակցության վրա փոխքաղաքապետ Վարշամ Սարգսյանը տեղից թռավ և իմ վրա գոռաց, թե դուռը բացի, դուրս գնա, քեզ կարգի հրավիրի, արի: Նեղվեցի, ասում եմ՝ ինչ իրավունքով, որպես կին, տնօրեն ինչո՞ւ եք ինձ վիրավորում: Դուրս եկա և զանգեցի քաղաքապետին: Հարցրեց, թե ինչի համար եմ զանգել, ասացի, որ փոխքաղաքապետի ոչ կոռեկտ պահվածքի պատճառով և բարկությունից ասացի, որ չմոռանա, թե որտեղից է եկել՝ խոզապահ: Այդ բառի համար երեք օր է՝ կռիվներ է, զեկուցագիր են գրում, թե պիտի ազատենք աշխատանքից»,-ասում է Թամարա Ավետիսյանը:
Նա այսօր էլ բարձրացել է քաղաքապետարան, բացատրել է իրավիճակը, որ վիրավորելու ցանկություն չի ունեցել, բարկացած ժամանակ է ասել: Սակայն բացատրությունները չեն ընդունվել: Թամարա Ավետիսյանը նշեց, թե Արմավիր քաղաքում մոտ 15 օր խոսակցություններ են շրջում, որ քաղաքապետի ընկերոջ կինն է թիվ 8 մանկապարտեզում աշխատելու:
«Ոչ քրեական հանցագործություն եմ արել, ոչ կաշառք է եղել, ոչ մի նմանատիպ բան»,- ասում է Թ. Ավետիսյանը և հավելում, որ սուտ բան չի ասել և որևէ մեկին վիրավորելու ցանկություն չի ունեցել, պարզապես նշել է այն, որ փոխքաղաքապետը խոզ է պահում:
Թամարա Ավետիսյանն ասում է, որ համայնքապետարանի կրթության, գիտության, մշակույթի, սպորտի և երիտասարդական հարցերի բաժնի պետ Արաքսյա Դոլինյանը մանկապարտեզների տնօրեններին «իր բռի մեջ հավաքելու» սկզբունքով է աշխատում:
«Հին ձևերը շարունակվում է: Ասում եմ՝ ինչու եք հին ձևերով աշխատում, առաջ էլ էր այդպես: Չէր թողնում քաղաքապետի մոտ բարձրանայինք յուրաքանչյուր հարցով, ասում է՝ ես կասեմ»,- նշում է Թ. Ավետիսյանը՝ հավելելով, որ դեռ աշխատանքից ազատվելու հրամանը չի ստացել:
Արմավիրի համայնքապետ Դավիթ Խուդաթյանը «Հետք»-ի հետ զրույցում ասաց, որ Թամարա Ավետիսյանին աշխատանքից ազատելու որոշումն արդեն ստորագրել է, իր սեղանին դրված է: Օրվա ընթացքում այդ մասին կտեղեկացնեն նաև Թամարա Ավետիսյանին և օրվա ընթացքում կփոխանցվի նաև հանձնման-ընդունման կարգադրությունը:
Դավիթ Խուդաթյանը պատմեց, որ աշխատանքային քննարկման ժամանակ Թամարա Ավետիսյանն իրեն թույլ է տվել մանկավարժին ոչ հարիր կեցվածք, չի կարողացել կառավարել իրեն: Դրանից հետո պարզաբանում ներկայացնելու նպատակով, Թամարա Ավետիսյանն իր նախաձեռնությամբ զանգահարել է իրեն (քաղաքապետին, հեղ.) և հեռախոսային խոսակցության ժամանակ ոչ հարիր բառապաշարով է խոսել կրթության բաժնի պետի, փոխքաղաքապետի մասին, ինչը հիմք է օրենքով սահմանված կարգով լուծել աշխատանքային պայմանագիրը:
«Ամբողջ հարցն այն է, որ մեր ուսումնական հաստատություններում ցանկանում ենք տեսնել մարդկանց, որոնք հունից դուրս չեն գալիս, իսկ հունից դուրս եկած ժամանակ փորձում են էթիկայի տարրական կանոնները պահել: Ի՞նչ է նշանակում մարդու մասին, պետական պաշտոնյայի, Արմավիրի փոխքաղաքապետի մասին նման անվայելուչ արտահայտություններ թույլ տալ: Այսինքն մենք քննարկում ենք, թե ով ինչո՞վ է զբաղվել նախքան հեղափոխությունը և ով ո՞նց է պահել իր ընտանիքը նախքան հեղափոխությունը»,- հավելեց Դավիթ Խուդաթյանը:
Ինչ վերաբերում է այն հարցին, որ թիվ 8 մանկապարտեզում աշխատանքի է անցնելու իր ընկերոջ կինը, Դավիթ Խուդաթյանը նշեց, թե նմանատիպ խոսակցություններ եղել են նաև թիվ 5-րդ դպրոցի հետ կապված, ինչն իրականություն չի դարձել:
«Բոլորին թվում է, թե մենք մարդկանց գործի տեղավորելու խնդիր ունենք: Ավելին ասեմ, մոտ 8 ամիս, այս պահին էլ, ունենք մանկապարտեզի տնօրենի թափուր հաստիք, մենք մարդ տեղավորելու, ընկերոջ կնոջ տեղավորելու հարց չունենք»,- ասում է Դավիթ Խուդաթյանը, նշելով, որ իրենք նախապատվությունը տալիս են «ներսի մարդկանց» և պետական կառավարմանը:
Մեկնաբանություններ (1)
Մեկնաբանել