Վերաքննիչ քրեական դատարանում՝ դատավոր Լուսինե Աբգարյանի նախագահությամբ, այսօր սկսվեց Հայաստանի երկրորդ նախագահ Ռոբերտ Քոչարյանի խափանման միջոց կալանավորումը գրավով չփոխարինելու որոշման դեմ նրա պաշտպանների բողոքի քննությունը:

Ռոբերտ Քոչարյանը նիստին ներկա չէր. դատավորը հայտնեց՝ ուղեկցող գումարտակից փոխանցել են, որ Քոչարյանը «Իզմիրլյան» բժշկական կենտրոնում է: Վերջինս օրեր առաջ բժշկական կենտրոն է տեղափոխվել՝ հետվիրահատական հետազոտություն անցնելու համար:

Պաշտպաններից Հայկ Ալումյանը հայտնեց, որ Քոչարյանը դիմում է հասցեագրել դատարանին, որում ասվում է, որ ինքը տեղյակ է այսօրվա դատական նիստի մասին, չի ցանկանում մասնակցել, խնդրում է այն անցկացնել առանց իր ներկայության:

Դատավոր Լուսինե Աբգարյանը հետաքրքրվեց կողմերից՝ արդյոք ունե՞ն իրեն ինքնաբացարկի միջնորդություն ներկայացնելու հիմքեր: Մեղադրող և տուժող կողմերը նման հիմքեր չնշեցին, իսկ պաշտպանական կողմը նախքան դիրքորոշում հայտնելը միջնորդեց նիստը դարձնել դռնփակ, որպեսզի կարողանան ինքնաբացարկի հետ կապված հարցեր ուղղել ու դիրքորոշում հայտնել:

«Անհրաժեշտ է, որ Դուք բացահայտեք մի քանի հանգամանք՝ կապված որոշ շահագրգիռ անձերի հետ»,- նշեց պաշտպան Հայկ Ալումյանը:

Դատարանը որոշեց նիստի այս փուլը դարձնել դռնփակ: Քիչ անց դատական նիստերի դահլիճից դուրս եկավ «Մարտի 1-ի գործով» մեղադրյալ, գեներալ Յուրի Խաչատուրովի պաշտպան Միհրան Պողոսյանը: Վերջինս հայտնեց, որ ինքը ծանուցված է եղել նիստի մասին և ներկայացել է դատարան: Դռնփակ դատական նիստի ընթացքում Պողոսյանը հայտարարել է, որ այս գործին պետք է մասնակցի անձը, ում ազատությունը սահմանափակվել է, և մեղադրանքի կողմը:

Ըստ Միհրան Պողոսյանի՝ անգամ եթե ինքը դատավորին ինքնաբացարկ հայտնելու իրավական հիմքեր ունենար, չէր կարող այս գործի շրջանակներում ներկայացնել դա:

Քիչ անց նիստը նորից դարձավ դռնբաց, և Քոչարյանի պաշտպաններից Արամ Վարդևանյանը ինքնաբացարկի միջնորդություն ներկայացրեց դատավոր Լուսինե Աբգարյանին:

Ըստ Արամ Վարդևանյանի՝ դատավոր Լուսինե Աբգարյանի եղբայրը՝ Դավիթ Աբգարյանը, տարածել է Սերժ Թանկյանի գրառումը, որում նա գոհունակություն է հայտնել այն առիթով, որ Ռոբերտ Քոչարյանը վերջապես կալանքի տակ է: Արամ Վարդևանյանը նաև նշեց, որ Դավիթ Աբգարյանն, ըստ մամուլի հրապարակումների, մտերիմ հարաբերություններ ունի Վահե Գրիգորյանի հետ, որը նախկինում ներկայացրել է «Մարտի 1-ի գործով» տուժողների շահերը, իսկ այժմ Սահմանադրական դատարանի դատավոր է:

Ըստ Վարդևանյանի՝ Վահե Գրիգորյանն ու Դավիթ Աբգարյանը մեկ այլ գործով ներկայացուցչություն են իրականացրել ՄԻԵԴ-ում: Բացի այդ, Վարդևանյանը նշեց, որ դատավոր Լուսինե Աբգարյանը «Ֆեյսբուքում» հավանել է՝ լայք է դրել Դավիթ Աբգարյանի աշխատանքային գործունեության ընթացքում հաջողության հասնելու մասին Վահե Գրիգորյանի ֆեյսբուքյան գրառումը:

Պաշտպանը նաև նշեց, որ ըստ court.am կայքում առկա տեղեկատվության՝ դատավորը դեկտեմբերի 17-ից, այսինքն՝ վաղվանից պետք է արձակուրդ մեկնի, իսկ նրա արձակուրդի ժամանակահատվածը փոխելու վերաբերյալ որևէ տեղեկություն կայքում առկա չէ: Դատավոր Լուսինե Աբգարյանը տեղեկացրեց, որ իր արձակուրդի ժամանակը փոփոխվել է:

Միջնորդության քննությունը շարունակվում է:

Լուսանկարում՝ դատավոր Լուսինե Աբգարյանը