Դեկտեմբերի 18-ին Արտաքին գործերի նախարարությունում տեղի է ունեցել վարչապետի՝ նոյեմբերի 28-ի N 1765-Ա որոշմամբ ստեղծված «Քիմիական զենքի մշակման, արտադրության, կուտակման, կիրառման, արգելման և դրա ոչնչացման մասին» կոնվենցիայից բխող ՀՀ պարտավորությունների կատարման աշխատանքները կանոնակարգող միջգերատեսչական հանձնաժողովի (Ազգային մարմին) նիստը՝ շահագրգիռ գերատեսչությունների ներկայացուցիչների մասնակցությամբ:

ԱԳՆ տեղեկատվության և հասարակայնության հետ կապերի բաժնի հաղորդմամբ՝ նիստը վարել է ԱԳՆ միջազգային անվտանգության վարչության պետ Արմեն Եդիգարյանը:

Նիստի շրջանակներում ընդգծվեց Քիմիական զենքի արգելման կոնվենցիայից բխող ՀՀ պարտավորությունների պատշաճ իրականացման կարևորությունը և այդ գործում միջգերատեսչական հանձնաժողովի արդյունավետ և հետևողական աշխատանքների դերն ու նշանակությունը:

Նիստի ընթացքում քննարկվեցին Քիմիական զենքի արգելման կոնվենցիայի ազգային կիրառմանն առնչվող առկա խնդիրները, նախանշվեց այդ ուղղությամբ հետագա քայլերի իրականացման ճանապարհային քարտեզը, ինչպես նաև հաստատվեց հանձնաժողովի հետագա աշխատանքների կազմակերպման ժամանակացույցը: