Լրացուցիչ 40 միլիոն դրամ կտրամադրվի մարզիկներին և մարզիչներին վարչապետի անվանական թոշակ հատկացնելու համար
Օլիմպիական, պարալիմպիկ խաղերում, աշխարհի և Եվրոպայի առաջնություններում 2018 թվականին բարձր արդյունքներ ցուցաբերած մարզիկներին և մարզիչներին անվանական թոշակներ վճարելու նպատակով Կառավարությունը լրացուցիչ 40 միլիոն դրամ հատկացրեց։
Կրթության, գիտության, մշակույթի և սպորտի նախարարության հաղորդմամբ՝ անվանական թոշակների տարեկան ընդհանուր գումարը կազմում է 197 միլիոն դրամ։ Այն նախատեսված է 89 մարզիկների և 120 մարզիչների համար։
Նախարարությունը տեղեկացրել է, որ 2019 թվականի պետական բյուջեով Օլիմպիական խաղերում, աշխարհի և Եվրոպայի առաջնություններում բարձր արդյունքների հասած Հայաստանի հավաքական թիմերի մարզիկներին և նրանց մարզիչներին վարչապետի անվանական թոշակի հատկացման համար հաստատվել էր պայմանական գումար՝ 157 միլիոն դրամ։ Նախարարությունը ընդգծել է, որ 2018 թ. բյուջետային հայտի կազման և հանձման ժամանակահատվածը թույլ չի տվել հավաքագրել այդ տարվա՝ Հայաստանի հավաքականների մարզիկների նվաճումների արդունքների ամբողջ տվյալները: Այդ պատճառով առաջացել է պակասուրդ, և անհրաժեշտ է լրացուցիչ 40 միլիոն դրամ։
Լուսանկարը՝ ՄՕԿ-ի
Մեկնաբանել