«Հ. Շարամբեյանի անվան ժողովրդական ստեղծագործության կենտրոնը» պետությանը վերադարձրեց երկհարկանի շենքը
«Հ. Շարամբեյանի անվան ժողովրդական ստեղծագործության կենտրոնը» վերադարձրեց Արշակունյաց պողոտա 28/7 հասցեում գտնվող երկհարկանի շենքը։
Նման որոշում այսօրվա նիստին կայացրեց Կառավարությունը։ Կրթության, գիտության, մշակույթի և սպորտի նախարարության հաղորդմամբ՝ շենքի մակերեսը 970 քառ. մետր է, իսկ դրա սկզբնական արժեքը 27 միլիոն դրամ է։
Նախարարությունը շենքը «Հ. Շարամբեյանի անվան ժողովրդական ստեղծագործության կենտրոն»-ից վերցնելու որոշումը պայմանավորել է այն հանգամանքով, որ կենտրոնում իրականացվել են կառուցվածքային փոփոխություններ, ինչի արդյունքում նորաստեղծ «Ժողովրդական մշակույթի պահպանման և հանրահռչակման» բաժինը իր գործառույթներն իրականացնում է հանրապետության մարզերում։
Այդ իսկ պատճառով Արշակունյաց պողոտա 28/7 հասցեում գտնվող երկհարկանի շենքի օգտագործումը կազմակերպության կողմից դառնում է աննպատակահարմար. «Շենքի պահպանման համար լրացուցիչ ծախսերը բացառելու նպատակով նպատակահարմար է, որ այն վերցվի կազմակերպությունից»,- Կառավարություն ներկայացված որոշման նախագծում ընդգծել է Կրթության, գիտության, մշակույթի և սպորտի նախարարությունը։
Լուսանկարը՝ yerevancard.com/-ի
Մեկնաբանել