Զոհված զինծառայող Արթուր Աջամյանի հարազատներն այսօր առավոտից բողոքի ակցիա են իրականացնում Կառավարության շենքի դիմաց: Քիչ առաջ նրանք փակել էին Տիգրան Մեծ փողոցից Հանրապետության հրապարակ տանող ճանապարհն ու պահանջում էին հանդիպում վարչապետ Նիկոլ Փաշինյանի հետ: Աջամյանի մայրը նստել էր փողոցի երթևեկելի հատվածում ու պնդում էր, որ մինչև Նիկոլ Փաշինյանը չիջնի և իր հետ չզրուցի, տեղից վեր չի կենալու:

Աջամյանի պապն էլ հայտարարեց, որ եթե վարչապետը չիջնի, վաղը զինծառայողի դին կբերեն Կառավարության շենքի դիմաց:

Արթուր Աջամյանը մահացու հրազենային վիրավորում է ստացել դեկտեմբերի 2-ին՝ Արցախի ՊԲ հյուսիսարեևելյան ուղղությամբ տեղակայված զորամասերից մեկի պահպանության տեղամասում, նրա հարազատները պահանջում են բացահայտել, թե ինչ հանգամանքներում է զոհվել Արթուր Աջամյանը:

Նշենք, որ սպանված զինծառայողի հարազատներն այսօր մեկ անգամ ևս փակել էին փողոցը՝ կրկին Նիկոլ Փաշինյանին հանդիպելու պահանջով, սակայն, նրանց փոխանցմամբ, հանդիպել էին ոչ թե Փաշինյանին, այլ գործով քննիչին: Այսինքն՝ նրանց պահանջը չի կատարվել, ու նորից դիմել են փողոց փակելու քայլին:

Քիչ առաջ բողոքի ակցիայի մասնակիցները հանդիպեցին Նիկոլ Փաշինյանի օգնական Նաիրի Սարգսյանին, վերջինս հայտնեց, որ վարչապետը ցանկացել է հանդիպել զինծառայողի հարազատներին, սակայն տեղեկանալով, որ փողոց են փակել, վերանայել է որոշումը: Նաիրի Սարգսյանն առաջարկեց պահանջները ներկայացնել իրեն, սակայն քաղաքացիները հրաժարվեցին:

Հետո փողոցի երթևեկելի հատվածում լարված իրավիճակ ստեղծվեց: Ոստիկանները պարբերաբար փորձում էին բողոքի ակցիայի մասնակիցներին հեռացնել երթևեկելի հատվածից, ինչին քաղաքացիները դիմադրում էին: Րոպեներ առաջ Նաիրի Սարգսյանը նորից հանդիպեց բողոքի ակցիայի մասնակիցների հետ ու հայտնեց, որ Նիկոլ Փաշինյանը հանդիպման է հրավիրում: Այս պահին Աջամյանի հարազատներից մի քանիսը գնացել են հանդիպման: