Մ-6 միջպետական ճանապարհին հիմնանորոգված 3 թունելներում լուսավորություն չկա՝ չնայած մեկ տարի է՝ վերանորոգման աշխատանքներն ավարտված են։

«Հետք»-ի հարցմանը Տարածքային  կառավարման և ենթակառուցվածքների նախարարության  «Տրանսպորտային  ծրագրերի իրականացման  կազմակերպություն» ՊՈԱԿ-ից  հայտնում  են, որ Մ-6 Վանաձր-Ալավերդի–Վրաստանի սահման  միջպետական ճանապարհի «Ձորագետ–Փամբակ» ճանապարհահատվածում գտնվող  թունելներում նախագծով նախատեսված է եղել միայն  լուսավորության համակարգի տեղադրումը՝ առանց էլեկտրասնուցման արտաքին գծերին միացման։

«Ներկայումս էլեկտրասնուցման հարցը կարգավորված է, և ճանապարհը սպասարկող ընկերության պայմանագրում էլեկտրաէներգիայի սպառմանն առնչվող համապատասխան փոփոխություններ կատարելուց հետո թունելների լուսավորությունը կգործարկվի»,-հայտնում են ՊՈԱԿ-ից:

Սակայն թե երբ կլինի լուսավորությունը, հստակ ժամկետ չեն հայտնում:

Մ-6՝  նշված ճանապարհահատվածի երեք թունելներում կատարվում է խառը երթևեկություն՝ ավտոտրանսպորտ, հեծանվորդներ  և հետիոտն: Ալավերդու ավտոդպրոցի նախկին տնօրեն և ուսուցիչ Անմեղիկ Ահարոնյանի խոսքով, թունելներում անվտանգ երթևեկության կարևոր  նախապայման է ոչ միայն վարորդների տեսողության հետ հարմարեցված լուսավորությունն ու բարեկարգ ճանապարհը, այլև սահմանված արագության պահպանումը: Անմեղիկ Ահարոնյանի ասելով՝ դժբախտ պատահարներից խուսափելու համար, «Ձորագետ-Փամբակ» ճանապարհահատվածի հիմնանորոգումն ավարտելուց հետո,  շինարարական  կազմակերպությունը պարտավոր էր ճանապարհային նշաններով կահավորել թունելները և ապահովել դրանց լուսավորությունը: Իսկ առայժմ, հատկապես 276 մ երկարությամբ թունելում մեծ արագությամբ շարունակում են ընթանալ ավտոմեքենաները:

Այս թունելում գտնվող շրջադարձում ամեն օր կարելի է հանդիպել ավտոմեքենաների լամպերի ջարդված ապակիների:

Մեջտեղի՝ 276 մ  երկարությամբ թունելի ներսում  գտնվող վտանգավոր շրջադարձի մասին ճանապարհային նշանով վարորդները  չեն տեղեկացվում:

Լոռու մարզպետարանի տրանսպորտի բաժնի պետ Վ. Ղարսանյանը տեղյակ էր 276 մ երկարությամբ թունելի վտանգավոր շրջադարձին: Նրա ասելով՝ շրջադարձը վտանգավոր է դառնում միայն ավտոմեքենաների մեծ արագության դեպքում, իսկ սահմանված ժամում 40/կմ  արագությամբ վարելու դեպքում շրջադարձը որևէ վտանգ չի ներկայացնում երթևեկության համար:

Թունելից մեծ արագությամբ դուրս եկող ավտոմեքենաները բախվում են նաև  թունելի մուտքի հարևանությամբ գտնվող  ճանապարհի հենապատին: Բախման հետքերը  սպիտակ հենապատի վրա այժմ էլ պահպանվում են:  

«Ձորագետ –Փամբակ» ճանապարհահատվածի  երեք  թունելների անվտանգ երթևեկության սպառնալիքների մասին տեղեկատվություն խնդրեցինք ոստիկանության հասարակայնության  հետ կապերի  և լրատվության վարչության պետ Աշոտ Ահարոնյանից: Վերջինս հեռախոսով մեզ հայտնեց, որ ճանապարհային ոստիկանությունը որևէ պարտականություն չունի Մ-6 ճանապարհի «Վանաձոր- Թումանյան կայարան» ճանապարհահատվածի  թունելների հսկողության հետ. «Մենք վերահսկում ենք միայն մայրաքաղաքի  ճանապարհային թունելները»,- ասաց Աշոտ Ահարոնյանը:

Լոռու մարզպետարանի քաղաքաշինության վարչության պետ Կարեն Ջանազյանը մեզ հայտնեց, որ թունելներում ստեղծված վիճակի մասին պետք չէ ահազանգել, քանի որ մարզպետարանի քաղաքաշինության վարչությունը պատրաստվում է դրանց լուսավորության և մյուս խնդիրների մասին գրություն ուղարկել Տարածքային կառավարման և ենթակառուցվածքների նախարարություն:  

Հարցին՝ թե ինչու այդ գրությունը մեկ տարվա ընթացքում ավելի վաղ չեն  ուղարկվել, Կ. Ջանազյանը չպատասխանեց:  

Վերադառնալով թունելներում անթույլատրելի արագությամբ ավտոմեքենաները վարելուն՝  «Տրանսպորտային  ծրագրերի իրականացման կազմակերպություն»-ից հայտնել են. «Ըստ ճանապարհի կարգի Մ-6 Վանաձոր-Ալավերդի-Վրաստանի սահման  ճանապարհը համապատասխանում է 3-րդ կարգին‚ դժվար լեռնային հատվածներում համապատասխանում է 4-րդ կարգին‚ որտեղ երթևեկության արագությունը սահմանված է մինչև 40 կմ/ժամ։ Իսկ թունելներում արագությունը չպետք է գերազանցի 30 կմ/ժամը»։ 

««Ձորագետ-Փամբակ» ճանապարհահատվածի երեք թունելներով երթևեկում են նաև հարակից բնակավայրերի բնակիչները։ Այս առումով ավելի է կարևորվում  թունելների լուսավորության  հրատապ միացումը»,- ասում է Անմեղիկ Ահարոնյանը:

Անդրադառնալով 276 մ երկարությամբ թունելի մուտքի մոտ արագության ճանապարհային նշանին, Անմեղիկ Ահարոնյանը բացատրեց, որ այդտեղ արագության ճանապարհային նշան տեղադրելը պարտադիր չէ, քանի որ գրագետ վարորդը  թունել մտնելու նշան տեսնելուց հետո  պետք է հիշի այնտեղ սահմանված արագությունը և ավտոմեքենան վարի այդ արագությամբ:

Վարորդների կողմից թունելում ավտոմեքենաները մեծ արագությամբ վարելը Անմեղիկ Ահարոնյանը համարեց վարորդների պատշաճ գիտելիքներ չունենալու հետևանք:

«Հիմա ով ասես վարորդ է դառնում, պետք է վարորդների գիտելիքները լրջորեն ստուգվեն»,- ասաց Ահարոնյանը, ապա հիշեց խորհրդային ավտոդպրոցները, որոնք վարորդական իրավունք էին տալիս  միայն երթևեկության մասին պատշաճ գիտելիքներ ստացող քաղաքացուն:

Մարզպետարանի տրանսպորտի բաժնի  պետ Վ. Ղարսանյանն էլ հայտնեց, որ հունվարի  1-ից   Մ-6 միջպետական ճանապարհի «Ձորագետ-Փամբակ» ճանապարհահատվածի 3 թունելների  սպասարկման պատասխանատվությունը  դրվելու  է Վանաձորի երբեմնի քաղաքապետ Սամվել Դարբինյանին և վերջինիս եղբորը  պատկանող «ԼՈՌԻ ՃՇՇ» ՓԲԸ-ի վրա: