«ՀՀ ընտրական օրենսգրքում փոփոխություններ կատարելու մասին» կառավարության ներկայացրած օրինագիծը եւ իրավաբանական անձանց պետական գրանցմանն առնչվող հարակից օրենսդրական փաթեթի քննարկումը քիչ առաջ ցրեց Ազգային ժողովի դահլիճում տիրող «տխուր» մթնոլորտը: Կառավարությունն առաջարկում է ուժը կորցրած ճանաչել 2011 թվականի մայիսի 26-ի ընտրական oրենսգրքի 30-րդ հոդվածի 3-րդ մասի 2-րդ պարբերությունը, այն է՝ դիտորդների վկայականները Հայաստանում գրանցված հասարակական կազմակերպությունների դեպքում կարող են կնքվել նաեւ այդ կազմակերպությունների կնիքով:

Օրենքների նախագծերով առաջարկվում է իրավաբանական անձի անունից ցանկացած գործողության կատարում՝ առանց կնիքի օգտագործման: Այս սկզբունքով կառավարությունն առաջարկել է նաեւ օրենսդրության փաթեթային փոփոխություն, որի նպատակն է հեշտացնել գործարարությամբ զբաղվելը:

Նշենք, որ առկա օրենսդրության համաձայն՝ մի շարք փաստաթղթեր լրացնելիս կամ կազմելիս իրավաբանական անձը պարտավոր է դրանք հաստատել կազմակերպության կնիքով, իսկ որոշ դեպքերում կնիքով վավերացնելը թողնված է կազմակերպության ղեկավարի հայեցողությանը:

«Սույն օրենսդրական փոփոխությունների արդյունքում իրավաբանական անձանց գրանցման եւ գործարարություն սկսելու գործընթացները կարագանան եւ զերծ կլինեն ավելորդ քայլերից: Գործարարությամբ զբաղվելու մատչելիության բարձրացման հետ մեկտեղ կստեղծվի լայն դաշտ տնտեսության զարգացման համար: Նշված բարեփոխումների արդյունքում կբարելավվի նաեւ գործարարությամբ զբաղվելու մատչելիության գործակիցը համաշխարհային սանդղակում»,- օրենքի ընդունման անհրաժեշտությունը պատճառաբանում է կառավարությունը:

ԲՀԿ խմբակցության պատգամավոր Էռնեստ Սողոմոնյանը հակասություն գտավ արդարադատության եւ էկոնոմիկայի նախարարների հայտարարությունների միջեւ եւ իրոք ավելորդ համարեց կնիք պահելը՝ ասելով, թե այն պահելը «կայֆի բան չի»:

Հիմնական զեկուցող, արդարադատության նախարար Հրայր Թովմասյանն էլ հասկացավ, թե «կնիկ պահելը կայֆի բան չի», եւ փորձեց ճշտել:

«Կնիկ չէ, կնիք՝  печать»,- հստակեցրեց Էռնեստ Սողոմոնյանը: Պատգամավորական «կայֆերին» անմասն չմնաց նաեւ ԱԺ փոխխոսնակ Էդուարդ Շարմազանովը. «Այդ հաճույքներին կարելի է աշխատանքից հետո...»: