Տեսանյութեր
Լուսանկարներ
Հրայր Թովմասյանը նմա՞ն է Քադաֆիին
«Ժողովրդի դեմ ոչ թե բանակ չի կարելի հանել, այլ անգամ մեկ տեղամասային տեսուչ»,-Ազգային ժողովում հայտարարեց արդարադատության նախարար Հրայր Թովմասյանը: Խորհրդարանում այս պահին 24-ժամյա ռեժիմով քննարկվում է «Արտակարգ դրության իրավական ռեժիմի մասին» օրենքի նախագիծը։
Հիշեցնենք, որ պետության ներքին գործերին բանակի ներգրավմամբ նախագիծը ԱԺ-ում ընդունվել էր, սակայն կառավարությունը հետ կանչեց նախագիծը եւ նոր փոփոխություններով ուղարկեց ԱԺ:
Հրայր Թովմասյանը քիչ առաջ հայտարարեց, որ պաշտպանական ուժերը կարող են օգտագործվել միայն ներքին անվտանգության պաշտպանության համար, օրինակ՝ պաշտպանեն ռազմավարական եւ պետական նշանակություն ունեցող օբյեկտները (հեռուստաաշտարակը, ատոմակայանը եւ այլն):
«Եթե ինչ-որ մեկի մտքով անցնում է, որ սա կարող է գործիք լինել ընդդեմ քաղաքական հակառակորդների, նման լեքսիկոնը պետք է դուրս գա մեզանից»,- ավելացրեց նախարարը:
«Ժառանգություն» խմբակցության պատգամավոր Արմեն Մարտիրոսյանն էլ հայտարարեց, որ բանակը միայն սահմանները պաշտպանելու եւ արտաքին թշնամու դեմ պայքարելու համար է եւ Սահմանադրությամբ նախատեսված չէ բանակի օգտագործումը ներքին գործերին մասնակցելու հարցում: Պատգամավորի կարծիքով՝ նախագծի նշված դրույթը հակասահմանադրական է եւ, եթե «Ժառանգությունը» պատգամավորների համապատասխան թիվ ունենար, կդիմեր Սահմանադրական դատարան:
ՀՅԴ խմբակցության պատգամավոր Վահան Հովհաննիսյանն էլ Հրայր Թովմասյանի հայտարարությունները նմանեցրեց Քադաֆիի հայտարարություններին՝ ասելով, որ Լիբիայի առաջնորդն էլ էր այդպես մտածում եւ «տեսանք, թե ինչով վերջացավ»:
«Մեր երկիրը Քադաֆի չի եւ չի էլ լինելու որպես այդպիսին»,- հակադարձեց Հրայր Թովմասյանը:
Պատգամավոր Զարուհի Փոստանջյանը էլ Հրայր Թովմասյանին մեղադրեց Սահմանադրությունը յուրովի մեկնաբանելու մեջ, ինչը հակասում է Սահմանադրությանը: Պատգամավորի կարծիքով՝ զինակոչիկների ու զինապարտների հիմնական գործառույթը սահմանների պաշտպանությունն է, ոչ թե սահմանադրական կարգը:
ԱԺ-ն այսօր ավարտեց աշխատանքները, քննարկումները կշարունակվեն վաղվա նիստում:
Մեկնաբանություններ (2)
Մեկնաբանել