Երևան քաղաքի ընդհանուր իրավասության դատարանում՝ նախագահությամբ դատավոր Աննա Դանիբեկյանի, այսօր տեղի ունեցավ Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, նախկին փոխվարչապետ Արմեն Գևորգյանի և ՊՆ նախկին նախարար Սեյրան Օհանյանի գործով 2020-ին նշանակված առաջին դատական նիստը:

Այսօր շարունակվեց 2019-ի վերջին՝ դեկտեմբերի 3-ին, տեղի ունեցած դատական նիստում կիսատ մնացած միջնորդության քննությունը՝  ՊՆ նախկին նախարար Սեյրան Օհանյանի նկատմամբ քրեական հետապնդումը դադարեցնելու և գործի վարույթը կարճելու  մասին:

Միջնորդությունը ներկայացրել էր Օհանյանի պաշտպաններից Կարեն Մեժլումյանը: Վերջինս համեմատական տարավ 7-ի գործով անցնող անձանց և Օհանյանի ու մյուսների մեղադրական եզրակացությունների միջև, փաստեց, որ թե 7-ի գործով անցնող անձանց, թե այժմ ամբաստանյալի աթոռին հայտնված անձանց մեղադրանքը սահմանադրական կարգը բռնությամբ տապալելն է եղել, հիշեցրեց, որ նախկինում 7-ի գործով անցնող անձանց՝ Ալեքսանդր Արզումանյանի, Շանթ Հարությունյանի, Սասուն Միքայելյանի և մյուսների նկատմամբ քրեական հետապնդումը դադարեցվել է, քանի որ նրանց վերագրվող 300-րդ հոդվածում լրացում և փոփոխություն է կատարվել. արդյունքում սահմանվել է նոր հանցակազմ:

Մեժլումյանը հարց բարձրացրեց՝ եթե տարիներ առաջ 7-ի գործով անցնող անձանց մեղադրանքից դատախազությունը հրաժարվել է՝ պայմանավորված օրենքի փոփոխությամբ, ապա ինչո՞ւ այդ փոփոխությունը նույնանման իրավական հետևանք չի ունեցել նաև Սեյրան Օհանյանի, Ռոբերտ Քոչարյանի, Յուրի Խաչատուրովի և Արմեն Գևորգյանի մեղադրանքի վրա՝ դա որակելով խտրականություն:

Իր պաշտպանյալ Յուրի Խաչատուրովի նկատմամբ քրեական հետապնդումը դադարեցնելու միջնորդություն ներկայացրեց նաև պաշտպան Միհրան Պողոսյանը: Վերջինս հայտնեց, որ 2009-ին տեղի ունեցած օրենքի փոփոխությունից հետո, նկատի ունենալով, որ օրենքը հետադարձ ուժ չի կարող ունենալ, եթե անձի համար վատթարացնող հետևանք է առաջացնում, 7-ի գործով անցնող անձանց մեղադրանքը պաշտպանող դատախազները հրաժարվել են նրանց մեղադրանքից: Պողոսյանը հիշեցրեց, որ իր պաշտպանյալ Յուրի Խաչատուրովին, ինչպես նաև Ռոբերտ Քոչարյանին, Սեյրան Օհանյանին, Արմեն Գևորգյանին վերագրվում է ենթադրյալ արարք, որն, ըստ մեղադրանքի կատարվել է նույն ժամանակահատվածում՝ այսինքն՝ 2008-ին՝ մինչև Քրեական օրենսգրքի 300-րդ հոդվածում լրացումներ և փոփոխություններ կատարելը:

Իրենց պաշտպանյալների նկատմամբ քրեական հետապնդումը դադարեցնելու միջնորդություններ ունեն նաև Ռոբերտ Քոչարյանի և Արմեն Գևորգյանի պաշտպանները, սակայն այսօր այս միջնորդությունները չներկայացրին, նիստը հետաձգվեց, քանի որ պաշտպաններից Միհրան Պողոսյանն այլ անհետաձգելի նիստի պետք է մասնակցեր:

Մինչ նիստի հետաձգվելը դահլիճում իրավիճակը լարվեց: Տուժողի իրավահաջորդ Էդիկ Հարությունյանը առարկեց պաշտպանների՝ քրեական հետապնդումը դադարեցնելու վերաբերյալ միջնորդության դեմ՝ նշելով. «Թող հարգելի պաշտպանները հարգեն Մարտի 1-ը, թե չէ կհայտնվեն մեր տեղում»:

Ռոբերտ Քոչարյանի պաշտպան Հայկ Ալումյանը հայտնեց, որ իրենց հասցեին սպառնալիք է հնչել՝ նշելով, որ տուժողի իրավահաջորդի խոսքը մինչև վերջ իր համար լսելի չի եղել:

Ալումյանը խնդրեց տրամադրել դատական նիստի ձայնագրությունը, որպեսզի ամբողջովին լսի տուժողի ներկայացուցչի խոսքն ու կարողանա արձագանքել դրան:

Դատավոր Աննա Դանիբեկյանը հայտնեց, որ տվյալ պահին հնարավոր չէ լսել նիստի ձայնային կրիչը, որ այն նիստից հետո կտրամադրի կողմին:

Իրավիճակը լարվեց նաեւ նիստերի դահլիճում, ինչից հետո կարգադրիչները քաղաքացիներից մեկին դուրս հրավիրեցին դահլիճից:

Դատական հաջորդ նիստը նշանակվեց հունվարի 14-ին: