«Նրանք փորձում էին կոտրել ինձ». Կառլոս Ղոսնը բացատրում է, թե ինչու է փախել Ճապոնիայից
«Ռենո-Նիսան-Միցուբիշի» ավտոկոնցեռնի նախկին ղեկավար Կառլոս Ղոսնը, որը կոռուպցիայի մեղադրանքների պատճառով Ճապոնիայից փախել էր Լիբանան, խոսել է իր փախուստի պատճառների մասին:
Ըստ BBC-ի հաղորդման՝ Բեյրութում կայացած մամուլի ասուլիսում Ղոսնը խոսել է Ճապոնիայում իր դեմ առաջադրված մեղադրանքների մասին:
Հիշեցնենք, որ Կառլոս Ղոսնը ձերբակալվել է Ճապոնիայում 2018-ի նոյեմբերին: Նրան մեղադրանք է առաջադրվել չորս դրվագով՝ ներառյալ եկամուտները թաքցնելը եւ հարկերից խուսափելը։ Ձերբակալությունից հետո Ղոսնը կորցրել է «Ռենո-Նիսան-Միցուբիշի»-ի և «Ռենո»-ի գործադիր տնօրենի պաշտոնը:
Նախկին ղեկավարը պնդում է, որ դարձել է «Նիսան»-ի և Ճապոնիայի դատախազների դավադրության զոհը: Ըստ Ղոսնի՝ վերջիններս ցանկանում էին ազատվել իրենից, քանի որ նրանց դուր չի եկել ֆրանսիական «Ռենո»-ի աճող ազդեցությունը:
Խոսելով Ճապոնիայից փախուստի մասին ՝ Ղոսնը այն անվանել է իր կյանքի ամենադժվար որոշումը:
«Ես չեմ փորձել թաքնվել արդարադատությունից: Ես թաքնվում էի անօրինականությունից և քաղաքական հետապնդումներից»,- ասել է նա:
«Ես բախվել եմ մի համակարգի, որի դեպքում դատական գործերի 99.4% -ն ավարտվում է մեղադրական դատավճռով: Օտարերկրացիների դեպքում, ես վստահ եմ, որ այդ ցուցանիշը նույնիսկ ավելի բարձր է»,-ասել է նա:
Ղոսնի խոսքով ՝ 2018-ի վերջին՝ ձերբակալությունից հետո, նրան պահել են փոքր պատուհան ունեղող խցում և թույլ են տվել ցնցուղ ընդունել միայն օրը մեկ անգամ: «Ես կտրվել էի աշխատանքից, ընտանիքից և ընկերներից»,- ասել է նա:
Կառավարիչը պնդում է, որ իրեն առանց փաստաբանի հարցաքննել են օրական 8 ժամ և փորձել են ստանալ խոստովանություն ՝ ճնշում գործադրելով:
«Կամ պետք է մեռնեի Ճապոնիայում, կամ փախչեի այդտեղից, ես ինձ պատանդ էի զգում մի երկրում, որին ծառայել եմ 17 տարի»,-ասել է Ղոսնը:
Ինչպես նախկինում, այնպես էլ հիմա նա մեղադրում է Nissan-ի բարձրաստիճան պաշտոնյաներին:
«Ճապոնացի իմ ընկերներից ոմանք կարծում էին, որ Nissan-ի վրա Renault-ի ազդեցությունը չեզոքացնելու միակ միջոցն ինձանից ազատվելն է»,-ասել է նա:
Ասուլիսից հետո Ճապոնիայի դատախազությունը նշել է . «Ղոսնը հաշվի չի առնում իր պահվածքն ու ճապոնական քրեական արդարադատության համակարգի վերաբերյալ միակողմանի քննադատություններ է հնչեցնում: Սա լիովին անընդունելի է։ Իր ձերբակալման և կալանավորման համար Ղոսնը «պետք է միայն իրեն մեղադրի»:
Ճապոնիայի խնդրանքով Ինտերպոլը միջազգային հրամանագիր է արձակել Ղոսնի ձերբակալության համար: Ղոսնը փախել է Լիբանան, բայց այնտեղ նա չի ձերբակալվել:
Փախուստ Ճապոնիայից
Կառլոս Ղոսնը Ճապոնիայից Լիբբանան է փախել անցած տարվա դեկտեմբերի վերջին: Ասուլիսում Ղոսնը հրաժարվեց հստակ ասել, թե ինչպես է կարողացել լքել երկիրը, քանի որ նման տեղեկություններ հայտնելը, ըստ նրա, կարող է վտանգել նրանց, ովքեր իրեն օգնել են փախչել:
Հայտնի է, որ Ղոսնը Տոկիոյի իր առանձնատունը լքել է վիրաբուժական դիմակով (քաղաքի օդը կեղտոտ է, և բնակիչները հաճախ են կրում դիմակներ): Դրանից հետո նստել է ճեպընթաց, այնուհետև լքել երկիրը թուրքական ընկերությունից վարձակալած մասնավոր բիզնես-ջեթ ինքնաթիռով: Հետո մեկ այլ ինքնաթիռով Ստամբուլից թռել է Բեյրութ:
Wall Street Journal-ը գրում է, որ Կառլոս Ղոսնը թռիչքի առաջին մասում եղել է աուդիոսարքավորումների տուփի մեջ: Ենթադրաբար, նրանք դա չեն զննել Ստամբուլի օդանավակայանում, քանի որ այն չի տեղավորվել ինտրոսկոպում: Այս վարկածը, սակայն, պաշտոնապես չի հաստատվել:
Առանձնաատներ Ռիոյում եւ Բեյրութում
Չորեքշաբթի կայացած մամուլի ասուլիսի ժամանակ Ղոսնը խոսեց Ռիո դե Ժանեյրոյում և Բեյրութում գտնվող իր տների մասին: Լրատվամիջոցները գրում են, որ Ղոսնը դրանք գնել է կոռուպցիոն միջոցներով, չնայած Ճապոնիայում Ղոսնի դեմ հարուցված քրեական գործի մեղադրանքում առանձնատները չեն հիշատակվում:
Այնուամենայնիվ, Ղոսնը անհրաժեշտ համարեց դրանք հիշատակել «արատավորման արշավի» համատեքստում, որը, ինչպես պնդում է մենեջերը, նախաձեռնել էին իր դեմ լրատվամիջոցներում:
Ասուլիսում նա ներկայացրեց փաստաթղթեր, որոնք ստորագրել են «Nissan»-ի երկու աշխատակիցներ՝ Գրեգ Քելին և Ղոսնից առաջ պաշտոնավարողը՝ ընկերության նախկին ղեկավար Հիրոտո Սաիկավան, որպեսզի ապացուցի, որ առանձնատներն իրեն չեն պատկանում, այլ «Nissan»-ին, և որ թոփ մենեջերները գիտեն դրանց գնման մասին:
Ո՞վ է Կառլոս Ղոսնը
Կառլոս Ղոսնը լեգենդար հակաճգնաժամային մենեջեր է, որը կարողացավ վերադարձնել մի քանի ավտոհսկաների եկամտաբերությունը: Նա «Ռենո-Նիսան-Միցուբիշի» դաշինքի ճարտարապետն էր: 1999-ին ֆրանսիական «Renault»-ը, որի փոխնախագահն էր Ղոսնը, «Nissan»-ից 36,8% բաժնետոմս գնեց: Երկու տարի անց Ղոսնը ղեկավարեց ճապոնական ավտոկոնցեռնը, իսկ 2016-ին դաշինքին միացավ «Mitsubishi» ընկերությունը։
2018 թվականի նոյեմբերին Ղոսնը ձերբակալվել է Ճապոնիայի իշխանությունների կողմից՝ հարկերից խուսափելու փորձ կատարելու կասկածանքով: Ըստ քննիչների՝ Ղոսնը կարող էր թաքցնել իր վարձատրության չափը՝ որպես «Nissan»-ի տնօրենների խորհրդի նախագահ 2010-ից մինչև 2018 թվականը՝ հայտարարելով եկամուտների միայն կեսը: Ղոսնը չի ընդունում մեղադրանքը:
Ղոսնը կալանքի տակ մնաց 108 օր, իսկ 2019-ի մարտի 6-ին նրան 9 մլն դոլար գրավի դիմաց ազատեցին: Բայց ապրիլին նա կրկին կալանավորվեց արդեն նոր մեղադրանքներով, 20 օր անց նրան տնային կալանք նշանակեցին 5,4 մլն դոլար գրավի եւ կնոջ հետ շփումը սահմանափակելու խոստման դիմաց:
Այս երեքշաբթի ճապոնական դատարանը Ղոսնի կնոջը՝ Քարոլ Ղոսնին ձերբակալելու որոշում է կայացրել՝ մեղադրելով սուտ ցուցմունքներ տալու մեջ։
Անյա Սարկիսովա Գայանե Հովսեփյան
Լուսանկարը՝ Getty Images
Մեկնաբանել