![](/static/articles/01/12/02/l-ngqnIhuOrw.jpg)
«Չորրորդ ինքնիշխանություն». զուգադիպություն. ՀՀԿ-ի համար «չաշխատողները» հայտնվում են ոստիկանությունում
Բավականին լարված է նախընտրական մթնոլորտը Քանաքեռ-Զեյթուն համայնքում: Այստեղ մեծամասնական ընտրակարգով պատգամավոր դառնալու հայտ է ներկայացրել ԴԱՀԿ պետ Միհրան Պողոսյանի՝ Քեթրինի Միհրանի «մարդը»: Խոսքը ՀՀԿ-ական Արթուր Ստեփանյանի՝ Չախկալի մասին է:
Այս վարչական շրջանի ղեկավար, ՀՀԿ-ական Արայիկ Քոթանջյանը վաղուց հակասություններ ունի Միհրան Պողոսյանի և նրա հովանավորյալի հետ, ուստի այս օրերին հրապարակային հայտարարում է, թե «կաշխատի» ցանկացած թեկնածուի օգտին, բայց չի պատրաստվում «սատարման» երեկոներ կազմակերպել Չախկալի համար:
Այս խոսակցությունների մասին տեղեկացել է նաև Միհրան Պողոսյանը, որը իրավիճակը հասկանալու համար նախաձեռնել է մի ամբողջ «ռազբորկաների» շարք համայնքի «քաղաքականապես հասուն» հատվածի հետ: Մասնավորապես, Արայիկ Քոթանջյանին վերջինս հասկացրել է, որ թաղապետին չի կարող օգնության հասնել որևէ կլան, այդ թվում՝ ապարանյանը, և Պողոսյանն ինչպես ցանկանա, այդպես էլ կլինի համայնքում:
Քոթանջյանը, բնականաբար, չի թաքցրել իր մտադրությունները՝ հայտարարելով, որ ինքն է որոշելու՝ ում համար ինչ չափով աշխատի: Զրուցակիցները կոնսենսուսի չեն եկել, որից հետո համայնքում սկսվել է «մենթական տեռորը»:
Միհրան Պողոսյանի և Արթուր Ստեփանյանի կողմնակիցները համայնքի աշխույժ երիտասարդներին, որոնք չեն «աշխատում» ՀՀԿ-ի հետ, կանչել և գայթակղիչ առաջարկներ են ներկայացրել. ոմանց գումար են խոստացել, ոմանց էլ ասել են, թե կարող են լավ աշխատանքով ապահովել:
Նրանց, ովքեր չեն համաձայնել ընդունել «աշխատանքի հրավերը», խոսակցության այլ հարթություն են տարել՝ շոշափելով արժանապատվության և ուժային կառույցների հետ խնդիրներ ունենալու հնարավորությունը:
Արդյունքում, ուշ երեկոյան այդ համայնքում որոշակի հեղինակություն ունեցող տղաներից մեկը՝ Տու մականվամբ, հրավիրվել է ՀՀ ոստիկանության 6-րդ վարչություն՝ զրույցի: Մի քանի ժամ 6-րդ վարչությունում պահվելուց հետո վերոնշյալ անձը «ազատ է արձակվել»:
Ոստիկանությունում «ՉԻ» աղբյուրների փոխանցմամբ՝ քաղաքացուն հորդրել են չխառնվել քաղաքականությանը, այլապես հնարավոր է՝ այլ «սանկցիաներ» հետևեն: Բաժին տարվածը այն անձնացից մեկն է, ով հրաժարվել է «աշխատել» ՀՀԿ-ի օգտին:
Մեկնաբանություններ (1)
Մեկնաբանել