Փետրվարի 25-ին՝ ժամը 13:05-ին, առողջապահության նախարարություն ահազանգ է ստացվել, որ Աբովյանի ծննդատանը Ֆլորա Աբգարյանի ծննդալուծման ժամանակ դժվար կառավարվող բարդություն է առաջացել, և նեղ մասնագիտական օգնության կարիք ունեն:

Ահազանգից անմիջապես հետո առողջապահության նախարար Հարություն Քուշկյանի հրահանգով Աբովյանի ծննդատուն են մեկնել ՀՀ առողջապահության նախարարի տեղակալ Վահան Պողոսյանը, ՀՀ ԱՆ գլխավոր մանկաբարձ-գինեկոլոգ Ռազմիկ Աբրահամյանը, Կոտայքի մարզպետարանի վարչության պետ Գայանե Մարտիրոսյանը, Էրեբունի բժշկական կենտրոնի և «Մուրացան» մանկական կլինիկայի անհետաձգելի բուժօգնության ծառայության անձնակազմերը:

Դժբախտաբար, վերակենդանացման համալիր միջոցառումները ցանկալի արդյունք չեն տվել:

Փետրվարի 25-ին՝ ժամը 15:00-ին, արձանագրվել է Ֆլորա Աբգարյանի կենսաբանական մահը:

Փետրվարի 27-ին առողջապահության նախարարի հրամանով դեպքի ուսումնասիրման նպատակով հանձնաժողով է ստեղծվել: Ամբողջ օրը հանձնախումբը՝ առողջապահության նախարարի տեղակալ Վահան Պողոսյանի գլխավորությամբ, տեղում ուսումնասիրություններ է իրականացրել կազմակերպչական խնդիրներ և այլ հանգամանքներ պարզելու համար:

Առողջապահության նախարարություն