Երեւանի քաղաքապետ Կարեն Կարապետյանն այսօրվա աշխատանքային խորհրդակցության ժամանակ աշխատակազմի համապատասխան աշխատակիցներին հանձնարարել է ստուգայցեր կատարել քաղաքապետարանի ենթակայության բոլոր բուժհաստատություններում:

Զեկուցվել է, որ Երևանի քաղաքապետարանի աշխատակազմի մշակույթի վարչության կողմից ուսումնասիրություններ են կատարվել Երևան քաղաքի 17 մշակույթի տներում, մանկապատանեկան ստեղծագործության և գեղագիտական դաստիարակության կենտրոններում:

Պարզվել է, որ որոշ տեղերում նպատակային և արդյունավետ չեն օգտագործվում զբաղեցրած տարածքները, իսկ սուբսիդիայի տրամադրումը կատարվել է առանց հիմնավորումների` հաշվի չեն առնվել փաստացի աշակերտների և աշխատողների թիվը, զբաղեցրած տարածքը:

Հիմք ընդունելով ուսումնասիրությունների արդյունքները՝ քաղաքապետը հանձնարարել է կանոնակարգել դաշտը և հստակեցնել ոլորտի հետ կապված չափորոշիչները:

Մայրաքաղաքի հասարակական տրանսպորտի աշխատանքների կազմակերպման իրավիճակն ուսումնասիրելու նպատակով իրականացվող մոնիտորինգի ապրիլ ամսվա արդյունքների ամփոփիչ տվյալների համաձայն՝ հասարակական տրանսպորտի կանգառագոտում խախտում կատարողների թիվը կրճատվել է 16 %-ով, մեքենաների սանիտարական վիճակը բարելավվել է 40, իսկ վարորդների չսափրված երթուղի դուրս գալը նվազել է 30 %-ով:

Վերահսկողությունը, ինչպես հայտնում են քաղաքապետարանի մամլո ծառայությունից, խիստ և շարունակական է նաև շինհրապարակների կազմակերպման համար սահմանված անհրաժեշտ նորմերն ու ժամկետները խախտած կառուցապատողների նկատմամբ: Զեկուցվել է, որ 167 կառուցապատող քաղաքապետարանի կողմից արդեն զգուշացվել է:

Հանձնարարականի համաձայն զեկուցվել է նաև, որ վարչական շրջաններից տեղեկատվություն է տրամադրվել մոտ 900 բնակելի շենքերի վերնահարկերում կառուցված շինությունների վերաբերյալ: Հանձնարարվել է ստուգել և պարզել նշված շենքերի սեյսմակայունության վիճակը:

Հիշեցնելով, որ մայիսի 21-ը նույնպես մայրաքաղաքում հայտարարված է համաքաղաքային ծառատունկի և շաբաթօրյակի օր, քաղաքապետը աշխատակազմի  պատասխանատուներին հանձնարարել է պատշաճ իրազեկել շահագրգիռ գերատեսչություններին ու կազմակերպություններին` գործընթացն առավել հասցեագրված իրականացնելու համար:

Կարեն Կարապետյանը նշել է, որ  կանաչապատման աշխատանքների կազմակերպումը պետք է լինի համակարգված և իրականացվի բոլոր վարչական շրջաններում: